Kryemadhi thirret në Prokurori: Fundi i pushtetit
Kryetarja e Lëvizjes Socialiste për Integrim, Monika Kryemadhi, thirrjen e saj në Prokurori për rastin “Xhisela”, e cilëson si fundin e këtij pushteti, ndërsa akuzon prokuroren e Përgjithshme të përkohshme Arta Markun dhe prokuroren e Krimeve të Rënda si vegla të shurdhra të Kryeministrit Rama. Përmes një postimi në “Facebook”, Kryemadhi shkruan se frika që ka pushtuar maxhorancën tashmë nuk njeh më asnjë barrierë ligjore. “Në kohën kur krimi është shtrirë në çdo segment të qeverisë së Rilindjes, Prokuroria thërret për të dëshmuar kryetarin e opozitës. Në kohën kur kryetari i Grupit Parlamentar të PS- së është dukshëm dhe faktueshëm i përfshirë në afera kriminale, Arta Marku dhe Donika Prela, në shurdhësi dhe verbëri kriminale zbatojnë urdhrat e Edi Ramës, duke shënuar fundin e një shteti normal dhe duke firmosur regjimin kriminal dhe të diktaturës mafioze të tij. Ky i fundit, edhe pse në krye të Prokurorisë ka kukullat e veta, sërish nuk paraqitet për t’u përballur me akuzat dhe denoncimet që opozita ka dorëzuar për të. Sepse Edi Rama u frikësohet jo vetëm padive të opozitës në Prokurori, por edhe vetë atyre që ka emëruar atje”, shkruan Kryemadhi. Sipas saj, pushtetin e ka pushtuar frika duke mos njohur asnjë barrierë ligjore për ta mbajtur atë në këmbë. “Vajtja e sotme e kryetarit të opozitës në Prokurori është shenja e fundit e qartë se ky pushtet ka rënë! Frika që i ka pushtuar tashmë nuk njeh më asnjë barrierë ligjore. Dhe për këtë, përgjegjësi do të mbajnë të gjithë ata që sot drejtojnë Policinë dhe Prokurorinë me porositë e Edi Ramës dhe të vasalëve të tij. Askush mos të mendojë dhe shpresojë se shërbimi antiligjor që po iu bëhet personave të veshur me pushtet politik dhe që mbajnë përgjegjësi direkte për vepra kriminale, do të mbetet pa u ndëshkuar”, shkruan kryetarja e LSI- së, Monika Kryemadhi, në “Facebook”.