Rama me Macron: Vizitë e pritshme e Presidentit francez në Shqipëri
Kryeministri Edi Rama zhvilloi dje një takim me Presidentin e Francës, Emmanuel Macron. Takimi ndërmjet kreut të ekzekutivit shqiptar dhe Presidentit francez u zhvillua në Jerevan të Armenisë, ku po zhvillohet edhe Samiti i Frankofonisë.
Nëpërmjet një postimi në rrjetin social “Instagram”, Rama shkruan se tema e diskutimit me Presidentin Macron ishte për bashkëpunimin dypalësh ndërmjet dy vendeve dhe mbi vizitën e ardhshme të Presidentit francez në Shqipëri.
Takimi i Ramës me Macron vjen pas disa muajsh kur Shqipëria nuk mori dritën jeshile përhapjen e negociatave për anëtarësim, proces, i cili u shty për në qershor të vitit 2019.
Herën e fundit kur Rama zhvilloi një takim zyrtar me Macron ishte në 15 maj 2018 në Francë. Në atë kohë, shefi i ekzekutivit shqiptar kërkonte mbështetjen nga Franca për hapjen e negociatave pas raportit pozitiv që Komisioni Europian kishte publikuar. Por, krahas takimeve, Rama nuk arriti ta bindë Presidentin francez për të dhënë njëdritë jeshile për hapjen e negociatave për anëtarësim.
Mesa duket, përpjekjet e kreut të qeverisë po vijojnë në mënyrë që Franca të dalë nga vendet skeptike përsa u përket arritjeve të Shqipërisë në fushën e integrimit europian.
Krahas Francës, dy vendet e tjera skeptike që nuk u shprehën pro hapjes së negociatave për anëtarësim me Shqipërinë ishinHolanda e Danimarka, të cilat kërkuan në atë kohë shtyrjen pa afat të procesit të anëtarësimit të Shqipërisë në BE.