Negociatat, Soreca: Rezultate konkrete në luftën kundër krimit
Bashkimi Europian kërkon rezultate konkrete në luftën kundër krimit të organizuar dhe korrupsionit, në mënyrë që të vijojë i sigurt rrugëtimi për hapjen e negociatave për anëtarësim. Këtë pohim bëri ambasadori iri i BE- së në Tiranë, Luigi Soreca, gjatë takimit me Kryetarin e Kuvendit, Gramoz Ruçi. Ambasadori Soreca nënvizoi gjatë takimit se tetë muajt e ardhshëm janë vendimtarë për Shqipërinë. "Objektivi i BE- së është i qartë, Shqipëria duhet të jetë në BE dhe për këtë po punojmë të gjithë. Por për këtë duhen rezultate konkrete, sidomos në luftën kundër krimit të organizuar dhe korrupsionit", tha Soreca. Krahas kësaj, ambasadori i BE- së u ndal edhe te Reforma në Drejtësi, duke kërkuar më shumë angazhim për krijimin e organeve të reja në sistemin e drejtësisë. "Reforma në Drejtësi po lavdërohet për kurajën dhe përgjegjësinë që po demonstrohet për zbatimin e saj. Vetingu po funksionon, por është shumë e rëndësishme të krijohen organet e reja të sistemit dhe për këtë duhen shtuar përpjekjet". Një pikëtjetër e bashkëbisedimit ndërmjet Ruçi dhe Sorecas ishte edhe çështjae Reformës Zgjedhore ku u nënvizua nevoja për një kompromis politik. "Përsa i përket Reformës Zgjedhore, ajo po shkon drejt përfundimit, por për këtë duhet që partitë të mbështesin më shumë Komisionin e Reformës dhe të arrijnë një kompromis në të mirë të vendit", tha ambasadori i BE- së në Tiranë. Nga ana e tij, Kryetari i Kuvendit, Gramoz Ruçi, shprehu angazhimin e Kuvendit të Shqipërisë për të përmbushur të gjitha rekomandimet për hapjen e negociatave më qershor të vitit 2019. "Kuvendi është i angazhuar për realizimin e të gjitha detyrimeve të tij për kurorëzimin me sukses të hapjes së negociatave në qershor 2019. Pas publikimit të raportit me rekomandimet e Komisionit Europian për Shqipërinë, në maj 2018, Kuvendi hartoi Planin e Veprimit me 6 objektiva dhe 46 masa për realizimin e tyre", tha në takim Kryetari i Kuvendit.