PD insiston për arrestimin e Dakos: Zbardhja e aferave kriminale, e panegociueshme
Partia Demokratike ka përsëritur kërkesën për Prokurorinë dhe Policinë e Shtetit për arrestimin e kryebashkiakut të Durrësit, Vangjush Dako, nën akuzën e blerjes së zgjedhjeve. Nënkryetari i Grupit Parlamentar të PD- së, Gent Strazimiri, deklaroi se dosja “339”, në të cilën bën pjesë edhe Vangjush Dako nuk do të jetë “çudia që zgjat vetëm 3 ditë”. “Dosja ‘ 339’ është radiografia e pushtetit të lidhur me krimin, pushtetit në shërbim të krimit pushtetit, që këmben favore me krimin, në nevojën e përbashkët për të mbijetuar në kurriz të ligjit dhe interesit publik. ‘ Harresë’ për dosjen ‘ 339’ nuk do të ketë dhe arrestimi i Vangjush Dakos është prova, nëse në Shqipëri do të ketë apo jo drejtësi, do të ketë apo jo luftë kundër krimit, do të ketë apo jo normalitet ligjor e elektoral dhe për pasojë qeveri legjitime, si në çdo shtet normal. Legjitimiteti i qeverisjes në Shqipëri është po aq solid, sa ç’është paprekshmëria e bandave dhe banditëve si Vangjush Dako”, tha Strazimiri. Deputeti i PD- së kujtoi se për demokratët zbardhja e aferave kriminale e politike të provuara në dosjen “339” është e panegociueshme. “Dosja ‘ 339’ nuk do të mbyllet e as do të rrijë pezull, si një çudi e radhës, me të cilën shqiptarët do të mësohen. Jo! Zbardhja deri në fund e aferave kriminale e politike të provuara në dosjen ‘ 339’ është e panegociueshme dhe arrestimi i Vangjush Dakos si ndërlidhësi dhe ‘ hallezgjidhësi’ i bandave në këmbim të votës është hapi i parë i domosdoshëm dhe urgjent në këtë drejtim. Çdo ditë në liri për Vangjush Dakon, do të thotë një ditë më shumë skllavëri edhe më e rëndë për shoqërinë, do të thotë paprekshmëri për bandat, do të thotë shkatërrim provash, do të thotë presion e influenca kriminale që shtohen e forcohen për t’i siguruar pandëshkueshmëri Vangjush Dakos dhe bandave”, u shpreh deputeti i PD- së.