Gjonaj kërkon shkarkimin e kreut të Hetimit Tatimor të Shkodrës
Ministrja e Drejtësisë, Etilda Gjonaj, ka kërkuar ditën e djeshme shkarkimin nga detyra të kreut të Hetimit Tatimor të Shkodrës dhe 21 inspektorëve të tjerë në këtë drejtori. Rekomandimi u bë gjatë një tryeze për masat antikorrupsion ditën e djeshme. Në cilësinë e kryetares së Task- Forcës Antikorrupsion, Gjonaj kërkoi shkarkimin e drejtuesit. Sipas ministres, janë kryer inspektime në Drejtorinë e Hetimit Tatimor të Shkodrës pas një denoncimi në portalin shqipëriaqë duam. al dhe që zbuloi shkelje të rënda. "Një denoncim i kryer në platformën e bashkëqeverisjes shqipëriaqëduam. al ka qenë edhe në këtë rast pikënisja e këtij kontrolli të ushtruar nga Task- Forca Antikorrupsion, me objekt verifikimin e zbatimit të kuadrit ligjor në marrjen e masave administrative ndaj subjekteve ekonomike dhe ekzekutimin e tyre. Gjatë kontrollit janë konstatuar një sërë shkeljesh të ndryshme, të cilat lidhen me mosrespektimin e kritereve ligjore, shkelje të rregullave të inspektimit apo mangësi në plotësimin dhe mbajtjen e dokumentacionit përkatës. Nga kontrolli në Drejtorinë e Hetimit Tatimor Shkodër, për shkeljet e konstatuara, në raportin përfundimtar janë rekomanduar gjithsej 36 masa disiplinore, prej të cilave 22 largime nga puna dhe 14 vërejtje me paralajmërim për largim nga puna", ka thënë Gjonaj ditën e djeshme. Sipas saj, është rekomanduar largimi nga detyra i drejtorit të Drejtorisë së Hetimit Tatimor Shkodër, 21 inspektorëve të Hetimit Tatimor në të njëjtin dikaster. Me tej, ministrja Gjonaj vlerësoi bashkëpunimin mes TaskForcës dhe organeve ligjzbatuese për javët e fundit. "Ka vijuar bashkëpunimi shumë i mirë i Task- Forcës Antikorrupsion me Policinë e Shtetit, Prokurorinë dhe institucionet e tjera ligjzbatuese në vend. Nga strukturat e Policisë së Shtetit, gjatë javës së kaluar janë evidentuar 13 vepra penale në fushën e korrupsionit dhe vepra penale të kryera nga punonjës shtetërore publikë. Nga Policia e Shtetit janë proceduar penalisht 26 autorë, nga të cilët: 7 prej tyre janë të arrestuar dhe ndaluar; 17 autorë ndiqen në gjendje të lirë dhe 2 prej tyre janë shpallur në kërkim. Ndër personat e ndaluar janë 4 ish- punonjës të ZVRPP Kavajë, për të cilët Gjykata e Apelit Durrës ka dhënë masën e sigurisë ' Arrest në burg'", tha ajo. "Ne jemi të ndërgjegjshëm se lufta kundër korrupsionit është një sfidë e vazhdueshme dhe komplekse, që nuk mund të kufizohet as në kohë e as në hapësirën e kontrollit", përfundoi Gjonaj.