PRESIDENTI MATTARELLA: SKËNDERBEU SI "GARIBALDI I ITALISË"
Presidenti i Republikës së Italisë, Sergio Mattarella, në veprimtarinë e përbashkët me Presidentin Meta në Kolegjin e "Shën Adrianit" të Shën Mitër Koronës të Kalabrisë, në kuadër të Vitit Mbarëkombëtar të Heroit tonë, Gjergj Kastriotit Skënderbeu, vlerësoi figurën e heroit tonë kombëtar. "Heroi Kombëtar Shqiptar është quajtur shpesh dhe ' Garibaldi i Shqipërisë'. Ngjashmëri që e bën këtë përkujtim edhe më kuptimplotë. Si Garibaldi për Italinë, Skënderbeu nuk qe vetëm protagonist i bashkimit kombëtar, por me kalimin e kohës u kthye në simbol të krenarisë kombëtare. Një simbol në të cilin ' populli i shqiponjave' identifikohet edhe jashtë kufijve shqiptare. Ai mbrojti pareshtur vlera dhe parime, të cilat ruajnë dhe sot një aktualitet të patundshëm: pranimi i diversitetit, respekti i identitetit të individit, si pikënisje për ndërtimin e një identiteti kombëtar që përcillet në breza dhe përfshin, duke vlerësuar specifikën e gjithkujt", u shpreh Presidenti Mattarella. Sipas tij, Gjergj Kastriot Skënderbeu ka lënë një trashëgimi, e cila është aktuale dhe për kohën që jetojmë. "Trashëgimia më autentike dhe aktuale që ky strateg i aftë dhe i ndjeshëm, diplomat dhe politikan, na le pas është një model i formës së shtetit që bashkëlidh dhe di të respektojë diferencat. Një mesazh që na ndihmon të orientohemi dhe të veprojmë në një epokë, në të cilën duket sikur shumëzohen dhe mbivendosin e mbivlerësojnë artificialisht tensionet, ashpërsimi i përplasjeve, evidentimi i diferencave, ngritja e kufijve ideologjike ndarëse, të cilat nënkuptojnë një përballje të përhershme me ' tjetrin'", tha Presidenti italian.