Para 4 vitesh edhe Tahiri firmosi një urdhër të ngjashëm
Më shumë se 4 vite më parë, ish- ministri i Brendshëm Saimir Tahiri pati firmosur një urdhër të ngjashëm për strukturat e Ministrisë dhe të Policisë së Shtetit. Përveç neneve të Rregullores së Disiplinës së Policisë, që kontrollon etikën, veshjen dhe sjelljen, gjatë dhe jashtë orarit të punës, punonjësit e Policisë së Shtetit u urdhëruan që të mos dëmtonin reputacionin e institucionit. Ky urdhër, i bërë publik në shkurt të vitit 2014, përmbante 10 pika, në të cilat sanksionohen rregulla të qarta për përdorimin e rrjeteve sociale. Parashikonte masa disiplinore nëse konstatohej shkelja e ndonjërës prej këtyre pikave. Këto sanksione që u vendosën me një urdhër të posaçëm të ish- ministrit Tahiri, hynë në fuqi që prej datës 15 shkurt të vitit 2014 dhe zgjatën aq sa ai qëndroi në krye të këtij dikasteri. Me anë të këtij urdhri, Ministria e Brendshme u rikujtonte edhe një herë punonjësve të Policisë, se ishin paralajmëruar se mosrespektimi i këtij urdhri, frekuentimi i lokaleve me uni- formë e armatim gjatë orarit të punës, apo dhe postimet në rrjetet sociale, do të kishin masa të ashpra. Nga ana tjetër, urdhri paralajmëronte efektivët e Policisë dhe të Ministrisë së Brendshme që duhet të kujdesen edhe për sjelljen dhe veshjen e tyre. Duhet të kenë etikë në komunikim, të mos përdorin fyer- je apo të postojnë fotografi në "Facebook", që dëmtojnë imazhin e institucionit. Gjithashtu ky urdhër nuk u lejonte në asnjë rast, sidomos punonjësve të Policisë, që të mbanin varëse, unaza apo byzylykë. Në fund paralajmëroheshin se do të kishte masa disiplinore për këdo që nuk respektonte 10 pikat e këtij urdhri.