Hajdarmataj kërkon përjashtimin e gjyqtarit, ndryshoi orën e seancës

Ish- prokurori i dosjes “Tahiri”, i cili është transferuar në Prokurorinë e Pogradecit, ka kërkuar përjashtimin e gjyqtarit që po shqyrton padinë e tij në Administrative kundër urdhrit të Kryeprokurores Arta Marku, që e komandoi në rrethin e largët. Kërkesa e prokurorit Hajdarmataj ka ardhur pasi, sipas tij, gjyqtari Avdi Sejdi ndryshoi orën e seancës së planifikuar për t’u zhvilluar pa njoftuar palën paditëse. Bëhet fjalë për një seancë që duhej të zhvillohej javën e shkuar. Kërkesa për përjashtimin e gjyqtarit nga shqyrtimi i padisë është bërë përpara disa ditësh nga Hajdarmataj, që vazhdon betejën ndaj Markut në Administrative, ashtu si prokurorja tjetër, Sonila Muhametaj. Besim Hajdarmataj ishte një ndër tre prokurorët që u komanduan në rrethe nga Marku pas bojkotimit të shortit për dosjen “Shullazi” në shtator dhe një ndër 10 prokurorët e cilësuar “rebelë”, që refuzuan shortin dhe që janë ende nën hetim disiplinor nga Prokuroria e Përgjithshme. Ai kërkon me padinë e tij që të shfuqizohet urdhri dhe të kthehet në detyrën që mbante, prokuror i Prokurorisë së Krimeve të Rënda.. Kujtojmë se përplasja për shortin e “Shullazit” ndodhi në muajin shtator përpara se të jepej pretenca për grupin. Ishprokurori i dosjes, Ened Nakuçi, u largua jashtë vendit me leje, ndërsa prokurorja tjetër që kishte dosjen, Elisabeta Imeraj, ishte komanduar në krye të Prokurorisë së Tiranës. Për këtë, Prela mblodhi prokurorët dhe kërkoi që të hidhej në short zëvendësimi i tyre në dosje. Kjo u kundërshtua nga 10 prokurorë, që braktisën shortin, duke e cilësuar atë si antiligjor.