Zgjedhjet në SHBA, demokratët rimarrin pushtet pas 8 vitesh

Senati mbetet republikan, Trump: Fitorja më e madhe që nga ‘ 62

Demokratët rimorën kontrollin e Dhomës së Përfaqësuesve të martën mbrëma pas tetë vitesh jashtë pushtetit, duke krijuar tashmë mundësinë për një pengesë të madhe në axhendën legjislative të Presidentit Trump.

Por republikanët ishin në gjendje të zgjeronin shumicën e ngushtë të Senatit, duke ruajtur aftësinë për të konfirmuar vendimet shumë të rëndësishme mbi kandidatët gjyqësorë. Vendimi i ndarjes së pushtetit në Capitol Hill ndjek një nga periudhat më intensive dhe kaotike të fushatës së zgjedhjeve të mesmandatit, ku Presidenti Trump bëri fushatë të fuqishme nëpër SHBA për kandidatët republikanë. Por edhe demokratë të fuqishëm, përfshirë ish- Presidentin Barak Obama, bënë të njëjtën gjë për kandidatët demokratë. Trump ndihmoi në parandalimin e marrjes së të gjithë Kongresit nga demokratët dhe shmangu një përsëritje të situatës zgjedhore të mesmandatit të parë të Presidentit Obama në vitin 2010, kur partia e tij humbi 6 vende në Senat dhe 63 në Dhomën e Përfaqësuesve.

Kryetari në largim i Dhomës së Përfaqësuesve, republikani Paul Ryan, tha në një deklaratë se historia kishte përsëritur veten të martën në mbrëmje, duke vënë në dukje se që nga 1862, partia e Presidentit ka humbur mesatarisht 32 vende në Dhomën e Përfaqësuesve gjatë mesmandatit. Pas zgjedhjeve të së martës, demokratët duket se kanë marrë të paktën 24 vende më shumë në Dhomën e Përfaqësuesve, ndërsa republikanët kanë marrë të paktën dy vende më shumë në Senat. Presidenti Trump reagoi pozitivisht, duke shkruar në “Twitter”, “Nata shumë e suksesshme. Faleminderit të gjithëve!”

Demokratët kanë arritur të marrin kontrollin e dhomës së përfaqësuesve dhe projektohet të fitojnë 238 vende, duke i lënë republikanët me 197 vende, por republikanët do të marrin kontrollin e Senatit, duke e rritur përfaqësimin e tyre aty në 54 vende. Trump pretendoi se kjo ishte fitorja më e madhe e republikanëve në Senat në zgjedhjet e para të mesmandatit të një presidenti që nga koha e Presidentit Kennedy në 1962- in. “Ne pamë se një grup kandidatësh, që unë mbështeta, arritën sukses shumë të madh mbrëmjen e kaluar”. Presidenti tha se ishte një ditë e pabesueshme dhe Partia Republikane sfidoi historinë duke u zgjeruar në Senat. Kjo ishte një fitore për Trump sepse në Senat republikanët tashmë marrin kontrollin mbi të gjitha çështjet, emërimet kritike të gjyqësorit federal, përfshirë nominimet në Gjykatën Supreme. Por fitorja e demokratëve në Dhomë i jep shpresë të re liberalëve, që duan të hetojnë dhe ndoshta edhe të fajësojnë Presidentin. Marrja e shumicës në Dhomën e Përfaqësuesve siguron një konflikt dyvjeçar të ardhshëm, që paraprin zgjedhjet presidenciale të vitit 2020. Demokratët gjithashtu do të jenë në gjendje të ndalojnë listën legjislative të Trump, duke përfshirë fondet për muret e propozuara kufitare dhe një shkurtim taksash për klasën e mesme, ose të paktën të bëjnë lëshime të mëdha për çështje si reforma e emigracionit. Demokratët kryesorë kanë premtuar të hapin një sërë hetimesh në Shtëpinë e Bardhë pas rimarrjes së Dhomës, duke përfshirë hetimet në deklaratat e pashpjegueshme të taksave personale të Trump, aleancën e supozuar me Rusinë dhe shkeljet potenciale të etikës nga zyrtarët e administratës.