Legalizimet, lista e re me familjet që marrin tapitë
Publikohet lista e re me 1240 familjet që marrin lejen e legalizimit në Tiranë. Procedurat dhe praktikat për hipotekimin e pronës
Janë 1140 familje që marrin tapinë në kryeqytet. ALUIZNI ka publikuar dje listën e përfituesve.
Qytetarët që kanë emrin në listë duhet të paraqiten pranë Drejtorisë Kamzë- Vorë për të tërhequr lejen. Praktika e radhës që ndiqet është ajo për regjistrimin e pronës në Hipotekë dhe marrjen e certifikatës së pronësisë, një procedurë kjo që ndiqet nga Agjencia e Legalizimeve. Qytetarët njoftohen vetëm në rastet kur dosja e tyre ka mangësi si edhe në momentin kur do të duhet të paguajnë faturën e shërbimit. Kur kjo të ndodhë, përgatitet edhe certifikata e pronësisë, e cila dërgohet në shtëpi përmes shërbimit postar.
APLIKIMI Kërkesa do të bëhet nëpërmjet një formulari të posaçëm, i cili do të përmbajë të dhënat bazë për çdo familje. Brenda 10 ditëve nga depozitimi i kërkesës, Hipoteka ka detyrimin që të përmbyllë procedurat e regjistrimit. Por vonesat e shkaktuara në përmbylljen e këtij procesi kanë bërë që të jenë një numër i madh lejesh të lëshuara, por ende të pahipotekuara. Nisur nga kjo situatë dhe nevoja e ngutshme për të gjetur një zgjidhje sa më parë, pritet që shumë shpejt të konkretizohet edhe projekti për bashkimin "nën një çati" të tri institucioneve kyçe, siç janë ALUIZNI, Hipoteka dhe ATP.
REFORMA Brenda këtij viti pritet të miratohet edhe baza ligjore që do t'i hapë rrugë funksionimit të Agjencisë Shtetërore të Kadastrës. Ky institucion do të ketë në ngarkim të gjitha çështjet e pronësisë. Çfarë ka rëndësi përveç lehtësimit të procedurave, është edhe shkurtimi i afateve për marrjen e tapisë. Megjithatë, rezultatet pritet të shikohen pas 1 janarit, datë në të cilën fillon aktivitetin ASHK.