SHTESE 19 PER QIND Ushtarakët, sa rriten pagat për çdo kategori

Komisioni i Sigurisë në Parlament ka miratuar buxhetin e ri të Mbrojtjes. Shtesa në pagë sipas kategorive, nga gjeneralët deri tek ushtari më i thjeshtë

Panorama (Albania) - - FAQE 1 -

Komisioni i Sigurisë ka miratuar dje në parim buxhetin e Ministrisë së Mbrojtjes për vitin 2019, ku parashikohet edhe rritja e pagave për ushtarakët.

E pranishme në mbledhjen e Komisionit ishte ministrja e Mbrojtjes, Olta Xhaçka, e cila bëri prezantimin e buxhetit për vitin 2019.

PAGAT Deputetët e Komisionit të Sigurisë kërkuan informacion nga ministrja Xhaçka mbi rritjen e pagave për ushtarakët. Në përgjigje të interesimit të deputetëve, Xhaçka u shpreh se buxheti i vitit 2019 parashikon një rritje pagash deri në 19%. “Me këtë buxhet, ministri i Financave dhe Kryeministri kanë shprehur një vullnet për rritjen e pagave dhe për një trajtim më të mirë për ushtarakët. Bëhet fjalë për një rritje të shkallëzuar për gradat më të ulëta deri te grada major. Nuk parashikohet rritje pagash për gradat nënkolonel, kolonel dhe për gjeneral, për të cilët ka një trajtim relativisht të mirë, sidomos krahasuar me kategoritë më të ulëta dhe bëhet fjalë për të zgjidhur një problematikë të mbartur mes oficerëve dhe ushtarakëve, le të themi quhej ashtu siç e thatë edhe ju, pak diskriminuese. Sidomos krahasuar me Policinë e Shtetit, që është ajo e vështirësisë në punë. Sikurse projekti i madh për rritjen e pagave në mënyrë të shkallëzuar për të gjitha gradat e ulëta, përfshirë edhe gradën major, besoj se do të sjellë një ndryshim të qenësishëm në trajtimin e tyre, por edhe në përmirësimin e kushteve të jetesës për ta. Kjo rritje do të jetë e shkallëzuar deri në masën 19% për gradat më të ulëta. Nga kjo rritje pritet të përfitojnë 6800 punonjës ushtarakë”, u shpreh ministrja. VËSHTIRËSIA NË PUNË

Krahas rritjes së pagës për ushtarakët, për disa kategori të Forcave të Armatosura do të zbatohet shpërblimi i vështirësisë në punë. Ministrja e Mbrojtjes, Olta Xhaçka, u shpreh se për pilotët e Forcave Ajrore, Forcat Speciale, Forcat e Sigurisë, Forcat Detare, mjekët dhe infermierët e Forcave të Armatosura do të vihet në zbatim shpërblimi i vështirësisë në punë njësoj siç zbatohet për punonjësit e Policisë së Shtetit. “Ne kemi bërë edhe një projekt, për t’u njohur vështirësinë disa kategorive të caktuara, të cilat janë shumë të domosdoshme për Forcat e Armatosura, por sigurisht meritojnë një trajtim më të mirë. Bëhet fjalë për pilotët, Forcat Speciale, Forcat e Sigurisë, mjekët dhe infermierët, si dhe për forcat detare për t’u njohur vështirësinë në punë. Besoj se kjo do të zgjidhë atë dallim që kanë pasur këto kategori me Policinë”, u shpreh Xhaçka. Pas fjalës së Olta Xhaçkës, anëtarët e Komisionit e miratuan në parim buxhetin e Ministrisë së Mbrojtjes.

MINISTRJA XHAÇKA, DJE NE KOMISIONIN E SIGURISE

Newspapers in Albanian

Newspapers from Albania

© PressReader. All rights reserved.