Varrimi i ekstremistit me Vorio Epir dhe thirrje antishqiptare
Eksponentë të Agimit të Artë, me flamuj e simbole që nxisnin urrejtje. Ekstremistin Konstantinos Kaçifas e përcjellin si hero
Ceremonia e varrimit të Konstantinos Kaçifas shoqërohet me thirrje të forta të nacionalistëve grekë kundër shqiptarëve.
Gjithçka ka nisur që prej orëve të para të ditës së enjte, ku me qindra persona nga Greqia hynë në territorin e Shqipërisë përmes Pikës Kufitare të Kakavijës. Ata u mblodhën pranë shtëpisë së 35- vjeçarit në Bularat. Deri në momentin që u nxor arkëmorti nga shtëpia për të kryer nderimet e fundit, gjithçka ka qenë e qetë. Ndërsa pas shpalosjes së një flamuri të madh grek, mbi të cilin ishte shkuar "Vorio Epiri është Greqi", nisën dhe thirrjet nacionaliste dhe antishqiptare. Turma udhëhiqej nga mbështetës të Agimit të Artë. Një prej tyre që printe turmën ishte ekstremisti grek i Agimit të Artë, Babis Karathanos, i cili gjatë gjithë kohës mbante në duar një flamur grek. "Gjaku na thërret të djegim shqiptarinë, zjarr kundër qenve shqiptarë", "Duhet të dini se këto janë tokat tona, jemi në Vorio Epir këtu", "Bularati është Greqi, zhdukuni shqiptarë prej këtej", "Konstantinos Kaçifas je i pavdekshëm, na prij", ishin disa nga thirrjet më të rënda kundër shqiptarëve. Përveç thirrjeve për pretendime territoriale për atë që sipas tyre është "Epiri i Veriut", nuk munguan dhe thirrje për cilësimin e qytetit të Korçës si pjesë të territorit grek, por dhe të Maqedonisë. Nga ana tjetër, nuk munguan as thirrjet kundër gazetarëve shqiptarë, të cilët nuk u lejuan që të filmonin nga afër kortezhin. Numri i të pranishmëve në këtë ceremoni i kalonte rreth 1 mijë persona. Arkivoli i 35- vjeçarit gjatë transportimit nga shtëpia për në kishë qëndroi i hapur, ndërsa ishte mbuluar me flamur dhe në kokë mbante kapele ushtarake. Përcjellja për në banesën e fundit e Konstantinos Kaçifas është kryer pas 11 ditësh nga vrasja nga forcat RENEA në kodrat e fshatit Bularat, pasi hapi zjarr ndaj Policisë. Gjatë ceremonisë së zhvilluar, familjarë të 35vjeçarit si dhe personazhe të tjera kanë mbajtur disa fjalime, të cilët e kanë quajtur Kaçifas si të pavdekshëm. Ardhja nga Greqia në Shqipëri e shtetasve grekë për të marrë pjesë në ceremoninë mortore të Konstantinos Kaçifas, ka sjellë edhe radhë të gjata në Pikën Kufitare të Kakavijës. Në territorin grek, radha shkoi deri në rreth 3 kilometra. Autobusi i parë nga Athina mbërriti në orën 05: 30, ndërkohë që u vërejtën procedura të shtuara sigurie në kufi, me forca të shumta policore, skanim i autobusëve dhe kontroll fizik i pasagjerëve. Autobusë të shumtë u nisën dhe nga Selaniku, Volos, Patra dhe Janina. Mbi 500 persona kanë hyrë përmes kësaj pike kufitare, ndërsa për rreth 10 prej tyre u ndalua një gjë e tillë për shkak se mbanin simbole antishqiptare. Policia e Gjirokastrës mësohet se ka shoqëruar katër shtetas grekë, të cilët do të pro- cedohen për "nxitje urrejtjeje mes kombeve dhe feve". Shtetasve grekë, Policia shqiptare u gjeti bluza me simbole antishqiptare, kapuça dhe sende të tjera të ndaluara. Nga ana tjetër, Ministria greke e Punëve të Jashtme dhe Mbrojtjes së Qytetarëve u bëri thirrje shtetasve grekë që të tregonin vetëpërmbajtje dhe respekt. Thirrjet dhe provokimet vazhduan deri sa u mbyll ceremonia mortore. Megjithatë, nuk pati incidente. Në ceremoni u vu re edhe pjesëmarrja e eu- rodeputetes së Qipros, Eleni Theoharis, si dhe e deputetëve shqiptarë, Vangjel Tavo dhe Vangjel Dule. Në fshat nuk u vunë re uniforma të Policisë shqiptare, por efektivë civilë kanë qenë të pranishëm për të monitoruar situatën. Por në distancë, përveç forcave të policisë lokale, ishin në gatishmëri 5 grupe të Forcave të Ndërhyrjes së Shpejtë. Përveç thirrjeve nacionaliste të eksponentëve të Agimit të Artë, ceremonia u mbyll pa ndonjë incident të rëndë.