Incidenti, "Të prehet në varrezat e ushtarëve grekë"
Ekstremistët e Agimit të Artë debatojnë me familjen e Kaçifas
GJIROKASTER- Ekstremistët grekë, të pranishëm dje në ceremoninë mortore të Konstantinos Kaçifas, kanë tentuar të krijojnë incident gjatë momentit të meshës në kishën e Bularatit. Ata nuk kanë qenë dakord që trupi i të riut të prehej në varrezën e fshatit. Disa të rinj, të cilët dyshohet se i përkasin grupit të ekstremistëve të Agimit të Artë, i kërkuan familjes që trupi i Konstantinos të prehej në varrezat e ushtarëve grekë, që ndodhet po në Bularat. Kjo ka krijuar edhe debat mes tyre dhe familjarëve, pasi këta të fundit kanë këmbëngulur që varrimi ishte vendosur tashmë që të kryhej në varrezën e fshatit. Gjithsesi, sipas burimeve, ka pasur një tentativë kur ende trupi nuk i ishte dorëzuar familjes, për të organizuar mundësinë e varrimit në varrezat e ushtarëve të rënë. Por më pas, familja dhe pjesa tjetër e të interesuarve për të realizuar diçka të tillë janë tërhequr, pasi janë informuar nga persona që kanë njohuri rreth rregullores, se një gjë e tillë ishte e pamundur. Kjo, pasi së pari duhej një procedurë e gjatë për t'i kërkuar shtetit shqiptar diçka të tillë dhe së dyti, Konstantinos Kaçifas nuk kishte rënë në luftë që të nderohej te varrezat e ushtarëve grekë. Pasi kanë marrë një informacion të tillë, famil- ja dhe të afërmit janë tërhequr nga kjo nismë, e cila është nxjerrë në pah sërish dje nga ekstremistët, deri edhe në formë debati me familjarët e viktimës. "Trupi duhet të varroset te varrezat e ushtarëve grekë, pasi Konstantinos ka rënë si hero", ka këmbëngulur grupi i të rinjve ekstremistë gjatë ceremonisë. Por familjarët iu kanë kërkuar të mos përzihen në këtë çështje, pasi tashmë vendi se ku do të prehej djali i tyre ishte përcaktuar dhe kjo nuk mund të ndryshohej më. Konstantinos Kaçifas u vra më 28 tetor në Bularat, ndërkohë që kishte vetëm një javë që ishte kthyer nga Greqia. Baba i një vajze 10 vjeçe hapi zjarr ndaj Policisë, ndërkohë që pas ndjekjes dhe refuzimit për t'u dorëzuar, u qëllua për vdekje nga forcat RENEA. Kaçifas njihej në fshatin e tij si person konfliktual dhe nacionalist. Fqinjët e tij tregojnë se i riu kohët e fundit kishte shfaqur shenja të një sjelljeje depresive. Ditën e ngjarjes, Kaçifas nuk ka diskutuar me askënd për ndonjë kundërvënie ndaj Policisë apo për ndonjë veprim të tijin. Por ndërkohë, në profilin e tij në "Facebook" kishte bërë thirrje për reagim. "Tsipras dhe Rama bëjnë plane pa ' të zotin e shtëpisë'… Për një gjë të jenë të sigurt, të rinjtë e Vorio Epirit nuk do të jenë spektatorë. Të gjithë grekët e Epirit të Veriut më 28 tetor të jenë gati për të dërguar një mesazh në çdo drejtim. Grek ose vdekje", shkruante i riu më 23 tetor.