Tarifat në universitetet publike, në sitën e KLSH
Abuzimet me paratë e studentëve, Kontrolli i Shtetit së shpejti raport
Denoncimet e shumta me abuzimet e parave të studentëve në universitetet publike kanë iniciuar Kontrollin e Lartë të Shtetit të nisë një audit në shtatë universitete shtetërore, proces që do të finalizohet së shpejti, pas marrjes së mendimit të vetë studentëve.
Në faqet zyrtare të fakulteteve e universiteteve po bëhet ndarja e një pyetësori me të rinj që janë në proces studimi apo e kanë përfunduar në 2- 3 vitet e fundit. Numri i sallave e cilësia e auditorëve, aksesi dhe pasuria e bibliotekave të shkollës, pajisjet elektronike e didaktike si dhe roli i stafit akademik në orientimin e tyre janë disa nga pikëpyetjet kryesore që ka hartuar ekipi i KLSH- së për të evidentuar mangësitë në formimin cilësor të studentëve, që frekuentojnë universitetet publike. Ndërkohë që tarifat për çdo program shkollimi janë tashmë transparente, në fund të pyetësorit kërkohet të zbulohet nëse e gjithë ajo çka familjet shpenzojnë për gjithë ciklin shkollor ia ka vlejtur. “Besoni se arsimimi ju ka përgatitur për tregun e punës?”, është pyetja që shtrohet për ata që kanë për- funduar shkollimin së fundmi dhe janë punësuar. Në fund të pyetësorit, gjithsecilit prej tyre që paguan për të marrë një shërbim të caktuar, iu kërkohen sugjerime për përmirësimin e cilësisë, të cilat do të pasqyrohen në raportin që KLSH- ja do të hartojë dhe që do t’ia paraqesë Ministrisë përgjegjëse në formën e rekomandimeve. Aktivistët për një universitet cilësor thonë se vendi ynë ka tarifat më të larta në rajon për studime, por nga ana tjetër nuk iu ofrohen shërbimet bazë që tek auditorët, lab- oratorët, mjetet mësimore e të tjera. Studimi i kryer nga “Qëndresa qytetare” ka zbuluar se universiteti më i madh në vend ka një sistem informatik jashtë funksioni prej më shumë se një viti, ndërkohë që paguan ende miliona për mirëmbajtjen e tij. Një tjetër gjetje është se universitetet më të mëdha në vend nuk kanë shpenzuar asnjë lek për kërkimin shkencor apo bursa studimi, ndërsa numërojnë miliona lekë të shkuara për kolltukë e gjyqe për largime nga puna.