Prokurori Troci sot para vetingut, pasuria iu rrit 28 herë për 14 vjet
Komisioni i Pavarur i Kualifikimit i është rikthyer listës prioritare të vetingut me thirrjen në seancë dëgjimore të prokurorit të Prokurorisë së Përgjithshme, Ramadan Troci, të premten. Troci është kandidat për Këshillin e Lartë të Prokurorisë- institucion që pret përfundimin e tre kandidatëve të fundit për t'u ngritur. Hetimi administrativ për Ramadan Trocin është kryer nga trupa gjykuese e drejtuar nga Pamela Qirko dhe me anëtare Genta Tafa Bungon dhe Suela Zhegun, shkruan BIRN- i. Prokurori Troci e ka nisur karrierën në institucionin e akuzës në vitin 2000 dhe përgjatë një dekade ka punuar si prokuror në Bulqizë dhe në Dibër. Në vitin 2012, ai u transferua në Prokurorinë e Tiranës, në vitin 2014 në Prokurorinë e Vlorës dhe prej vitit 2016 punon si prokuror në Prokurorinë e Përgjithshme. Të dhënat e siguruara nga BIRN- i tregojnë se prokurori Troci zotëronte vetëm një makinë me vlerë 300 mijë lekë në vitin 2003, kur deklaroi pasurinë për herë të parë në Inspektoratin e Lartë të Deklarimit dhe Kontrollit të Pasurive, ILDKPKI. Në fund të vitit 2017, pasuria familjare e zotit Troci është rritur me 28 herë, duke kapur vlerën e 8.5 milionë lekëve. Të dhënat e siguruara tregojnë se pasuria familjare e prokurorit Troci përbëhet nga një shtëpi e deklaruar në vlerën 5.4 milionë lekë, likuiditete prej 2.1 milionë lekësh në bankë, 900 mijë lekë kursime në cash dhe një automjet me vlerë 300 mijë lekë. Të ardhurat familjare të Trocit kapin vlerën e 25.5 milionë lekëve për periudhën 20032017. Rreth 99 për qind e të ardhurave kanë si burim pagën e tij dhe të familjarëve, ndërkohë që 1 për qind përbëhet nga të ardhurat nga qiraja dhe interesat bankare. BIRN- i kreu kontrollin aritmetik/ logjik për 14 vitet e deklarimit të prokurorit Ramadan Troci dhe të gjitha deklaratat e pasurisë rezultojnë pa probleme. Prokurori Troci ka qenë personi që ka firmosur urdhërarrestin ndaj ish- guvernatorit të Bankës së Shqipërisë, Ardian Fullani, i cili u arrestua përkohësisht më 5 shtator të vitit 2014. Gjithashtu, Troci ka firmosur urdhërarreste edhe për ish- zyrtarë të tjerë si ish- kryebashkiakun e Vlorës, Shpëtim Gjika. Megjithatë, si Fullani ashtu edhe Gjika u shpallën të pafajshëm nga Gjykata. Bashkë me Trocin, ditën e nesërme do të jetë në veting edhe Arta Vorpsi, këshilltare ligjore në Gjykatën Kushtetuese.