SHBA e BE mbështesin Prokurorinë e Policinë: Na inkurajon përparimi
“Një Ministri e Brendshme plotësisht funksionale siguron vazhdimësinë e rezultateve të deritanishme”
Shtetet e Bashkuara të Amerikës dhe Bashkimi Europian i cilësojnë të suksesshme aksionet e fundit të realizuara përmes bashkëpunimit të Prokurorisë dhe Policisë së Shtetit dhe japin mbështetjen e tyre për një drejtësi të vërtetë.
Në një reagim të përbashkët, ambasadat e SHBA- ve dhe BE- së në Tiranë nënvizojnë faktin se muajt e fundit kanë mbetur të inkurajuar nga lufta kundër krimit të organizuar dhe korrupsionit. “Përgjatë muajve të fundit, jemi inkurajuar nga përparimi që kemi parë në luftën kundër krimit të organizuar dhe korrupsionit në Shqipëri – rezultat i drejtpërdrejtë i punës së bërë nga autoritetet shqiptare, veçanërisht oficerëve të Policisë dhe prokurorëve, të cilët luftojnë për drejtësi të vërtetë për të gjithë shqiptarët”, thuhet në reagimin e dy ambasadave në Tiranë. SHBA dhe BE kërkojnë edhe zgjidhjen e ngërçit institucional mes institucionit të Presidencës dhe Kryeministrisë për çështjen e dekretit të ministrit të Brendshëm, duke theksuar se një ministri plotësisht funksionale do të garantonte vijimin e rezultateve të arritura deri tani. “Ka ende punë për të bërë dhe presim që këto përpjekje jo vetëm të vazhdojnë, por edhe të shtohen. Një Ministri e Brendshme plotësisht funksionale është një element kyç për të siguruar vazhdimësinë e këtyre përpjekjeve dhe rezultateve të deritanishme”, theksojnë në reagimin e tyre të përbashkët SHBA dhe BE. Aleatët e Shqipërisë japin garancinë e tyre për të ofruar asistencë në luftën kundër krimit të organizuar dhe për të siguruar sundimin e ligjit. “Qeveria e SHBA- ve qëndron e gatshme për të punuar me partnerët tanë shqiptarë. Ne do të ofrojmë asistencë kudo që të jetë e mundur për të ndihmuar mposhtjen e krimit të organizuar e korrupsionit për të vazhduar përparimin e Re- formës në Drejtësi dhe për të siguruar sundimin e ligjit për popullin shqiptar”, përfundojnë reagimin e tyre SHBAtë dhe BE- së. Ky ishte reagimi i parë që ndërkombëtarët bëjnë për arrestimet e ditëve të fundit në aksionin policor “Vol- vo 4”, në të cilin u arrestuan pjesëtarë të grupeve kriminale dhe dy ish- deputetët e PS- së, Arben Çuko dhe Arben Ndoka. Gjithashtu, ditët e fundit dekreti i Sandër Lleshit, ministrit të Brendshëm të propozuar nga Kryeministri Rama u kthye në një përplasje të fortë me institucionin e Presidencës, pasi Meta vendosi të kthejë kandidaturën. Nga kjo e martë, Lleshi ka marrë detyrën e zv. ministrit, ndërkohë që PS ka deklaruar se pas një periudhe kohe, që i është lënë Presidentit për të reflektuar, dekreti mund të çohet përsëri në zyrën e tij.