Fleckenstein: Kam informacione pozitive për Lleshin
“Nuk di arsyet që ka Presidenti, ne duam ministri funksionale”
Raportuesi për Shqipërinë në Parlamentin Europian, Knut Fleckenstein, deklaroi sot në një konferencë për mediat se Bashkimi Europian kërkon që Shqipëria të ketë një Ministri të Brendshme funksionale. Po ashtu, Fleckenstein theksoi se, ka informacione pozitive sa i përket figurës së z. Sandër Lleshajt. “Informacionet që kam unë sa i takon zotit Lleshi, janë informacione pozitive, por nuk e di nëse e kam të gjithë informacionin, pasi Presidenti mund të ketë informacione më të thella që e çojnë në këtë vendim. Nuk jam personi që mund ta kritikojë Presidentin. Nga organizatat ndërkombëtare kam informacione të mira, por nuk përjashtohen informacione të tjera që ka presidenti”, tha Fleckenstein. Sa u përket arsyeve se përse Presidenti Meta nuk e dekreton Lleshin si ministër të Brendshëm, ai theksoi se nuk i di ato. “Nuk do të guxoja të mbaja anë këtu, por kemi një interes të përbashkët. BE kërkon që të ketë një Ministri të Brendshme që të jetë funksionale. Dhe kur themi funksionale, them ministër. Presidenti nuk ishte i bindur plotësisht dhe sot dëgjova se qeveria do t’ia japë të njëjtin propozim sërish. S’e di çfarë arsyesh ka Presidenti. Nuk e di se cila është gjëja e mirë apo jo. I njoh këta politikanë dhe shpresoj se do të ketë një zgjidhje për këtë çështje”, tha Fleckenstein. Deklarata e Fleckenstein është në sinkron me deklaratat e mëparshme të ambasadorit të BE- së në Shqipëri, Luigi Soreca, dhe Ambasadës Amerikane. Dy ditë më parë, me anë të një statusi në “Facebook”, Ambasada e SHBA theksoi se një Ministri e Brendshme plotësisht funksionale është një element kyç për të siguruar vazhdimësinë e luftës kundër krimit dhe drogës, ndërsa Soreca vlerësoi punën e Policisë së Shtetit, duke shtuar se ‘ vetëm një Ministri e Brendshme plotësisht funksionale është në gjendje të vazhdojë të luftojë me forcë kundër krimit’. Presidenti Ilir Meta ka pritur në një takim raportuesin për Shqipërinë në Parlamentin Europian, Knut Fleckenstein. Eurodeputeti gjerman ndodhet në Shqipëri në kuadër të një vizite zyrtare. Gjatë takimit, Meta dhe Fleckenstein e kanë vënë theksin e reformat në fushën e sundimit të ligjit, për të afruar momentin e çeljes së negociatave për anëtarësim në BE. “Pata kënaqësinë të takohesha me eurodeputetin Knut Fleckenstein. Vetëm reformat e vërteta në fushën e sundimit të ligjit do të çojnë drejt çeljes së negociatave të anëtarësimit në Bashkimin Europian”, shkruan Presidenti Meta në rrjetet sociale.