Unaza e Re, Basha me banorët: Kjo është vija e kuqe e dytë

Meta: Duhet dialog

Presidenti i Republikës, Ilir Meta, u ka kërkuar autoriteteve përgjegjëse të krijojnë një formë komunikimi dhe dialogu me banorët e Unazës së Re në Tiranë. Reagimi i kreut të shtetit erdhi pas disa ditë protestash të organizuara nga banorët e kësaj zone, të cilët janë kundër vendimit të qeverisë për të mos u dëmshpërblyer banesat apo bizneset që janë në proces legalizimi. "Presidenti i Republikës, Ilir Meta, po ndjek me shqetësim dhe vëmendje situatën konfliktuale të krijuar në Tiranë mes qytetarëve dhe autoriteteve për shkak të ndërtimit të Unazës së Re. Presidenti Meta bën thirrje për vendosjen e një dialogu dhe konsultimi mes qytetarëve dhe autoriteteve, me qëllim që të gjithë ankesat të vlerësohen me transparencë dhe përgjegjësi, me qëllim arritjen e një zgjidhjeje të drejtë dhe objektive. Presidenti Meta u bën thirrje të gjitha institucioneve të zbatojnë me përpikmëri procedurat ligjore për hartimin, miratimin dhe implementimin e këtij projekti urban në mënyrë që realizimi i tij të mundësojë një zgjidhje të drejtë për të gjithë qytetarët dhe interesin publik në tërësi", thuhet në reagimin e Presidencës. Lidhur me këtë ngjarje, Meta ka paralajmëruar se do t'u drejtohet në rrugë zyrtare institucioneve përgjegjëse për të marrë informacionin e duhur për procedurat që janë ndërmarrë. "Presidenti Meta do t'u drejtohet institucioneve përgjegjëse për të marrë informacionin e duhur në lidhje me ndjekjen e procedurave të deritanishme për këtë çështje. Të drejtat dhe liritë themelore të njeriut gëzojnë një mbrojtje të veçantë nga Kushtetuta e Republikës së Shqipërisë dhe të gjitha institucionet shtetërore duhet të tregojnë përgjegjshmëri në respektimin e plotë të tyre", sqaron Presidenca.