Kthimi i eshtrave, homazhe dhe ceremonial shtetëror
Mid’hat Frashëri nderohet në Akademinë e Shkencave, ceremoni elitare në Kodrat e Liqenit
Amaneti i personalitetit të shquar të kulturës kombëtare dhe letrave shqipe, Mid’hat Frashëri, u plotësua.
Nga dje eshtrat e tij të kthyera nga Shtetet e bashkuara të Amerikës u vendosën në Kodrat e Liqenit, në krah të babait të tij, Abdyl Frashërit dhe xhaxhallarëve Naim e Sami Frashëri. Përmes një ceremoniali shtetëror, të organizuar nga qeveria shqiptare me kërkesë të Institutit të Studimeve Historike “Lumo Skëndo”, dje mbërritën në Tiranë eshtrat e Mid’hat Frashërit nga Nju Jorku, ku ai ishte varrosur që në 1949. Arkëmorti, i cili ishte mbuluar me flamurin kombëtar, u vendos dje në orën 9 në sallën e Akademisë së Shkencave, ku qytetarë, politikanë, histori- anë, studiues, klerikë etj. i dhanë lamtumirën e fundit në tokën e tij Mid’hat Frashërit, figurës aq të debatuar mes të majtës dhe të djathtës shqiptare. Në një faqe muri të sallës së Akademisë së Shkencave të arreduar posaçërisht për këtë ceremoni, ishte vendosur një fotografi gjigan- de e pjesëmarrësve të Kongresit të Manastirit, mes të cilëve dhe Mid’hat Frashëri, si drejtues i tij, i cili 110 vite më parë, më 14 nëntor 1908, kishte nisur nga puna për miratimin e alfabetit shqip. Ceremonia zyrtare, që u zhvillua në Kodrat e Liqenit, ishte më elitare, me pjesëmarrjen e anëtarëve të trupit diplomatik në Tiranë, krerëve të katër besimeve fetare në vend, pjesëtarëve të diasporës sonë në Amerikë, studiuesve, historianëve, politikanëve, ndërsa ra në sy mungesa e opozitës. Nuk i shpëtoi kjo ceremoni dhe pakënaqësive të pjesëtarëve të Partisë “Balli Kombëtar”, të cilët nuk kishin marrë ftesa për këtë moment të aktivitetit, edhe pse drejtuesit politikë të Ballit, Adriatik Alimadhi dhe Legalitetit, Ekrem Spahia, ishin të pranishëm. E kuruar më së miri në çdo detaj, pa shumë fjalime, ceremonia ishte konceptuar në dhënien e mesazheve të forta nga dy zëra, siç ishte studiuesi Aurel Plasari dhe Kryeministri Edi Rama, i cili nën një frymë edhe reflektimi u mundua të nxjerrë figurën e Mid’hat Frashërit nga baltosja 70vjeçare e politikës dhe historisë, siç edhe ai vetë e tha, për ta cilësuar “një personalitet pa të dytë në historinë e elitave shqiptare”. Arkëmorti u përcoll për në varrin e hapur në krah të vëllezërve Frashëri nga një njësi e forcave të armatosura dhe një përfaqësi e ushtrisë së SHBAve. Tre të shtënat me armë nga forcat e Gardës së Republikës dhe dorëzimi i flamurit kombëtar të palosur familjarëve të Mid’hat Frashërit ishin dhe epilogu i një ceremonie, që kishte ndezur prej ditësh debatet pro dhe kundër saj në mediat shqiptare.