Ndryshon formati i testit, për gradën “Komisar”, si u shmang korrigjimi elektronik
Konkursi u anulua 6 ditë pas shpalljes së rezultateve. Për gradën "Kryekomisar" testi ndryshoi pak para nisjes së provimit
Për Policinë e Shtetit konkursi i zhvilluar për gradën "Komisar", më datë 7 nëntor, u anulua për parregullsi. Kjo ishte arsyeja që drejtori i Përgjithshëm i Policisë, Ardi Veliu, urdhëroi ritestim.
Por nga ana tjetër, disa oficerë që iu nënshtruan këtij konkursi thonë që parregullsia qëndron te vetë anulimi e më tej, edhe të ndryshimi i procedurave e formati i testit. E para, sepse anulimi nuk ndodhi për ndonjë rast flagrant parregullsie, por 6 ditë pasi ishin shpallur rezultatet dhe e dyta sepse asnjë nga monitoruesit e procesit në Akademinë e Sigurisë, nuk raportoi për shkelje. Sipas urdhrit të Veliut, ritestimi i kandidatëve për gradën "Komisar" ishte parashikuar të kryhej sot, megjithatë duket se edhe kjo datë është anuluar. Nga ana tjetër, nuk kaloi pa incidente edhe konkursi i së hënës për gradën "Kryekomisar". Dëshmitë e disa oficerëve të pranishëm në konkurs, qoftë si pjesëmarrës, qoftë si mbikëqyrës, flasin edhe për largim të përfaqësuesve të misioneve të huaja, të cilët ishin të pranishëm si vëzhgues. E sipas dëshmitarëve, kjo ka ndodhur për shkak se vetëm pak minuta para se të niste konkurrimi është ndryshuar formati i testit. Format, që me shumë mundësi do të jetë i ngjashëm edhe për ritestimin për gradën "Komisar". Ndryshe nga si është përcaktuar me rregullore, që testi përmban 100 pyetje me alternativa, të cilat korrigjohen me aparaturën elektronike "Scantron" dhe rezultatet dalin brenda pak orësh, në këtë konkurs nuk ka ndodhur kështu. FORMATI I TESTIT Në rregulloren e Policisë së Shtetit, të miratuar me VKM nr. 750, datë 16.09.2015, përcaktohet qartësisht se si duhet të kryhet korrigjimi i testit. Në pikën 4, të nenit 168 të kësaj rregulloreje, ku sqarohet pikërisht procesi i testimit me shkrim, thuhet: Si rregull, testi me shkrim korrigjohet në formë elektronike, brenda ditës dhe rezultatet u bëhen të ditura aplikantëve nëpërmjet afishimit në ambientet e zhvillimit të testimit. Më tej, aplikanti, që arrin pikët e nevojshme për kalimin e testit me shkrim, vazhdon fazat e tjera të testimit, ndërsa aplikanti i skualifikuar ndërpret procesin e konkurrimit. Për konkursin e zhvilluar më datë 7 nëntor, atë për gradën "Komisar", testi i tillë ishte, me 100 pyetje me alternativa, që u korrigjuan me "Scantron". Konkurronin 470 oficerë për 175 vende me gradën "Komisar". Por ky konkurs u anulua. Ndërsa konkursi i së hënës, ku u testuan 270 oficerë për gradën "Kryekomisar", për 133 vende, ishte ndryshe dhe rezultatet ende nuk janë shpallur. Kjo për arsye se në këtë rast është shmangur korrigjimi elektronik. Pak minuta para nisjes së konkursit ka ndryshuar formati i testit. Ishin po aq, 100 pyetje, por vetëm 50 ishin me alternativa, ndërsa 50 të tjerat me shtjellim. Madje, ndryshonte edhe vlera e pyetjeve. Një përgjigje e saktë me alternativa, vlerësohej me 0.8 pikë. Pra, llogaritet që për 50 pyetje të sakta me alternativa, kandidati vlerësohej me 40 pikë, ndërsa për 50 të tjerat me shtjellim, me 60. Ndërkohë, me këtë lloj formati korrigjimi elektronik me aparaturën "Scantron" del jashtë funksionit. Pasi kjo aparaturë njeh vetëm py- etjet me alternativa. Megjithatë, nëse kjo konsiderohet apo jo parregullsi, mbetet për t'u parë me ndonjë urdhër tjetër. Disa oficerë, që i janë nënshtruar këtij konkursi, në kushtet e anonimatit u shprehën se pas përfundimit të provimit, testet janë administruar për korrigjim në Drejtorinë e Përgjithshme të Policisë. Në një kohë që në pikën 2 të nenit 173 të Rregullores së Policisë së Shtetit thuhet: Pas mbylljes së procesit të konkurrimit për fitimin e gradës, dokumentacioni administrohet në Akademinë e Sigurisë.