Drafti i Brexit, May merr mbështetje nga kabineti pas 5 orësh debate
Pas një takimi që zgjati rreth pesë orë me ministrat e kabinetit të saj, Kryeministrja britanike, Theresa May, ka marrë mbështetjen për planin e tërheqjes nga BE. Drafti i Brexit, për të cilin May ka gjetur konsensus një ditë më parë me negociatorët e Bashkimit Europian, pas mbështetjes nga kabineti qeveritar në Britaninë e Madhe, shënon një hap të madh drejt finalizimit të largimit të vendit nga BE. plani duhet ende të marrë mbështetjen nga krerët e shteteve europiane brenda këtij muaji dhe më pas do të votohet në Parlamentin britanik, përpara se të ndodhë Brexit në muajin mars të vitit të ardhshëm. Votimi në Parlamentin britanik do të jetë shumë i vështirë dhe plani mbetet realisht i rrezikuar. Një pjesë e ligjvënësve që mbështesin largimin e vendit nga BE, përfshirë edhe ish- ministra të kabinetit të May, mendojnë se me këtë draft nuk përmbushet asnjë nga synimet që kërkonte Brexit dhe Britania do të mbetet e bllokuar në një union doganor për shuam e shumë vite më radhë, pa qenë në gjendje që të bëjë marrëveshje të reja të tregtisë së lirë. Kur foli për mbështetjen e marrë nga ministrat, May ishte dukshëm shuam e lodhur. “Unë besoj plotësisht me kokën dhe zemrën time se ky vendim është në interesin më të mirë të Mbretërisë së Bashkuar. Ky draft është plotësisht në interesin kombëtar dhe përmbush premtimet e referendumit”. Kritikët e draftit thonë se May nuk po plotësonte atë, për të cilën kishin votuar mbështetësit e Brexit. Ishministri i Jashtëm britanik, Boris Johnson, i cili dha dorëheqjen në korrik për shkak të planit të May, iu bëri thirre ministrave të kabinetit që ta refuzonin draftin. Ai deklaroi të mërkurën se ky draft e bënte Britaninë një vend vasal.