OKB, ambasadorja e Kosovës përplaset me ministrin serb

Në Këshillin e Sigurimit të OKB ka pasur përplasje mes përfaqësuesve të Kosovës dhe Serbisë, mbi respektimin e marrëveshjeve dhe se cila nga dy palët ka bërë shkelje të rregullave duke provokuar kështu palën tjetër. I pari që ka marrë fjalën ka qenë ministri i Jashtëm serb, Ivica Daçiç, i cili ka akuzuar autoritetet e Kosovës se nuk respektojnë asnjë marrëveshje dhe se po provokojnë. Ai i është referuar vizitës së Presidentit Thaçi në Ujman, së bashku me njësitet speciale të Policisë së Kosovës ROSU, duke thënë se prania e tyre ishte një provokim për Serbinë dhe popullin serb; themelimit të Ushtrisë së Kosovës, duke thënë se një gjë e tillë është në kundërshtim më rezolutën 1244; vrasjes së Oliver Ivanoviç, politikanit liberal serb në Veri në Kosovës; dhe mosformimin e Asociacionit me shumicë serbe. Pas tij ka folur ambasadorja e Republikës së Kosovës në SHBA, Vlora Çitaku, e cila po përfaqëson Kosovën në sesionin e Këshillit të Sigurimit të Kombeve të Bashkuara. Ajo ka përmendur vizitën e Presidentit serb, Aleksander Vuçiç, në liqenin e Ujmanit. Çitaku ka thënë se në vend se Vuçiç të dërgonte mesazhe paqeje nga ajo vizitë, ai ka thurur lavde për Sllobodan Millosheviçin, njërin prej shkaktarëve të një prej tragjedive më të mëdha në Ballkan. Çitaku ka folur edhe për vizitën e Presidentit Thaçi në Liqenin e Ujmanit, duke thënë se atë ditë nuk u shënua asnjë incident dhe se për një vizitë të tillë, Thaçi nuk ka nevojë që ta pyesë askënd dhe se mund të lëvizë i lirshëm në të gjithë territorin e Republikës së Kosovës. Për çështjen e formimit të Ushtrisë së Republikës së Kosovës, Çitaku tha se formimi i saj bëhet për të rritur stabilitetin dhe paqen në rajon dhe për të kontribuar në paqen e përgjithshme ai ka thënë se formimi i Ushtrisë së Kosovës nuk po bëhet për të pasur pretendime territoriale ndaj ndonjë shteti.