Kryemadhi: Caktojmë kandidatët, pakt me opozitën për të hyrë në zgjedhje
Lëvizja Socialiste për Integrim kërkoi dje zyrtarisht që të ketë një marrëveshje koalicioni parazgjedhor me Partinë Demokratike. Kryetarja e LSI- së, Monika Kryemadhi, gjatë një takimi me strukturat e LSI- së Sarandë theksoi se Lëvizja Socialiste për Integrim ka filluar hartimin e listave të kandidatëve potencialë dhe se duhet të ketë një marrëveshje me PD- në për të pasur kandidatë të përbashkët. "Ne tashmë jemi në një front opozitar. Do të shkojmë drejt marrëveshjeve, do të hyjmë bashkërisht në zgjedhjet lokale, në përzgjedhjet e kandidatëve. Partia Demokratike ka filluar punën e saj për përzgjedhjen e kandidatëve, të cilët duhet të jenë fitimtarë në të gjithë fushatën elektorale. Ashtu sikurse edhe ne si LSI kemi filluar dhe jemi në kontakte me strukturat dhe drejtues- it për përzgjedhjen e kandidatëve tanë", u shpreh Kryemadhi. Ndonëse janë në opozitë, LSI prej disa ditësh ka ndezur motorët elektoralë për të maksimizuar votën. Gjatë takimit të djeshëm në Sarandë, Kryemadhi i kërkoi strukturave vijimin e punës për të ruajtur ritmin e votave të marra në zgjedhjet e 2017- s. "Të gjithë kemi dëgjuar për dekretimin e zgjedhjeve të 30 qershorit dhe strukturat e LSI- së tashmë nuk kanë më kohë për të ndenjur, por duhet të fillojnë të përgatiten dhe të bëhen gati. Jo vetëm për hartimin e listave për këshilltarë, por për evidentimin edhe njëherë të gjithë atyre strukturave të LSIsë, të cilat në zgjedhjet e 25 qershorit i dhanë një rezultat të jashtëzakonshëm", tha Kryemadhi.