Ekstradimi i Gulen nuk po merret në konsideratë

Presidenti Trump i hodhi poshtë raportimet se administrata e tij po konsideronte ekstradimin e një armiku të Presidentit turk, Recep Tayyip Erdogan, që jeton në Pensilvani, me qëllim që të ulë tensionet midis Turqisë dhe Arabisë Saudite. Autoritetet turke besojnë se Fethullah Gulen ishte i përfshirë në një grusht shteti të dështuar në vitin 2016. Qeveria ka kërkuar që Shtetet e Bashkuara ta dërgojnë atë në Turqi. Javën e kaluar, “NBC News”, duke cituar katër burime të paidentifikuara, raportoi se Shtëpia e Bardhë po shqyrtonte nëse do ta ekstradonte Gylen për të kërkuar nga Erdogan, që të frenojë sulmin ndaj Princit saudit për vrasjen e gazetarit Jamal Khashoggi, i cili u vra në konsullatën saudite në Stamboll. “Nuk është në shqyrtim”, tha Trump. “Ne kemi një moment shumë të mirë me Turqinë. Erdogan është një mik i imi. Ai është një njeri i fortë, i fuqishëm dhe është një burrë i zgjuar”. Në tetor, Sekretari Amerikan i Shtetit, Mike Pompe, tha se bisedoi me zyrtarët turq rreth Gulen. “Ne folëm për Fethullah Gulen ... Është diçka që turqit na kujtojnë shpesh dhe ne jemi të ndërgjegjshëm për pjesët ku mund të punojmë me ta për të siguruar që të gjithë të kemi një grup faktesh të përbashkëta”, tha ai. Të enjten, zëdhënësja e Departamentit të Shtetit, Heather Nauert, u tha gazetarëve se agjencia ka marrë kërkesa të shumta nga qeveria turke për të ekstraduar Gulen dhe po vazhdojnë të vlerësojnë materialet. Departamenti i Drejtësisë të premten mohoi se po planifikonte një marrëveshje ekstradimi, sipas “Reuters”. Po ashtu edhe zyrtarë të qeverisë turke thanë se dy çështjet nuk kanë lidhje me njëra- tjetrën.