Të përndjekurit, afati për shpalljen e fituesve
Ministria e Financave do të shpallë në fillim të dhjetorit emrat e fituesve për këstin e tretë të dëmshpërblimit. Lista e 4150 trashëgimtarëve në radhë
Në fillim të dhjetorit, Ministria e Financës pritet të shpallë edhe listat e përfituesve të këstit të tretë.
Prej tri javësh ka nisur edhe procesi për plotësimin e dosjes nga ana e familjarëve të ish- të dënuarve. Në radhë janë jo pak, por 4150 trashëgimtarë, të cilët duhet të dorëzojnë dokumentet e nevojshme për marrjen e dëmshpërblimit. Gazeta risjell edhe një herë tjetër në botim emrat e trashëgimtarëve që kanë mangësi. Duhet thënë se një pjesë e konsiderueshme e tyre kanë bërë plotësimet e nevojshme, ndaj edhe vlen të theksohet se ata, të cilët e kanë përmbyllur këtë proces, pra e kanë dorëzuar dokumentacionin që kërkohet, nuk kanë më asnjë detyrim. Lidhur me afatet e pagesave, burime nga Ministria e Financave bëjnë me dije se do të nisin në fillim të muajit dhjetor. Për ndarjen e çdo kësti do të ndiqet rendi kronologjik, çka do të thotë se ata që e kanë marrë të parët këstin e parë, do të jenë të parët që do të përfitojnë edhe këstin e tretë e kështu me radhë.
DOKUMENTET
Sipas njoftimit të Ministrisë, secili prej përfituesve ligjorë, që mund të jenë fëmijët ose nipërit dhe mbesat e të dënuarit, duhet të dorëzojë pranë sektorit të pagave dhe dëmshpërblimeve: kopje të letërnjoftimit, numër llogarie, certifikatë vdekjeje, certifikatë të trungut familjar, dëshmi trashëgimie dhe prokurë. Në rastin kur aplikimet për dëmshpërblim janë bërë në mënyrë individuale nga çdo trashëgimtar, dosja konsiderohet gati për pagesë atëherë kur secili prej tyre ka bërë dorëzimin e do- kumentacionit. Për dorëzimin e dokumenteve familjarët kanë afat tre muaj. Nëse nuk arrijnë që brenda këtij harku kohor të bëjnë plotësimet që kërkohen, atëherë e drejta për dëmshpërblim i kalon një të dënuari tjetër që është në radhë. Por në momentin që bëhen 3 vjet nga shpallja e njoftimit dhe trashëgimtarët nuk kanë treguar interes, e drejta e dëmshpërblimit digjet.
FONDI
Nga fondi vjetor adresuar për kategorinë joparësore kanë mbetur edhe rreth 300 milionë lekë. Këto para do të ndahen deri në fund të këtij viti. Paralelisht po vijohet edhe me ndarjen e këstit të nëntë për ata ish- të përndjekur që jetojnë. Me dëmshpërblimin e plotë të tyre, i gjithë fondi vjetor që alokohet nga buxheti i shtetit do të përdoret për trashëgimtarët. Kjo do të thotë se vitin që vjen ritmet e pagesave për këtë kategori do të përshpejtohen. Financat sqarojnë se pagesa e këstit vijues do të kryhet mbi bazë të dokumentacionit të dërguar më parë, kur nuk ka kontestim nga rrethi i familjarëve ose të trashëgimtarëve.