Greqia, Rama: Jemi shumë afër zgjidhjes së problematikave
“Të gatshëm të përmirësojmë këtë marrëdhënie ditë pas dite”
Kryeministri Edi Rama i cilësoi historike dhe tradicionale marrëdhëniet mes Shqipërisë dhe Greqisë.
Në një intervistë me drejtorin e përgjithshëm të agjencisë greke të lajmeve, ANA- MPA, Michalis Psilos, në kuadër të konferencës "News agencies vs Fake News", të organizuar nga Agjencia Telegrafike Shqiptare në Tiranë, Rama tha se marrëdhëniet mes fqinjëve jo gjithmonë shfaqen pozitive. "Kjo është një marrëdhënie historike dhe tradicionale fqinjësie dhe, siç ndodh gjithmonë me fqinjët, jo çdo gjë shkon gjithmonë mirë. E dimë këtë nga fqinjët tanë, me çdo fqinj tonin, qoftë në fshat apo në qytet, është gjithmonë e njëjta gjë", theksoi Rama. "Ju mund ta kuptoni plotësisht këtë, nëse shikoni një ndeshje futbolli midis fqinjëve, është si… luftë", është shprehur Kryeministri Rama duke qeshur, sipas agjencisë greke të lajmeve. Rama theksoi se, megjithatë, "ne jemi shumë të gatshëm të përmirësojmë këtë marrëdhënie ditë pas dite dhe ne po e bëjmë këtë". Kryeministri Rama theksoi se "ndonjëherë ka edhe gjëra për të ardhur keq dhe ne duhet të merremi me to", por, "e rëndësishme është që mes popujve tanë nuk ka armiqësi". Sipas tij, mes popujve nuk ka urrejtje, duke akuzuar politikën për prishjen e tyre. "Grekët e duan Shqipërinë, shqiptarët e duan Greqinë. Pjesa tjetër është vetëm politike", theksoi zoti Rama. I pyetur nëse është planifikuar një takim mes tij dhe homologut grek, Aleksis Tsipras, Kryeministri Rama, sipas agjencisë greke të lajmeve, tha se "ne presim të takojmë së shpejti. Nuk e di se ku, në Tiranë apo në Athinë, por ne presim që të takohemi së shpejti". "Ne jemi në një proces dialogu dhe diskutimesh për shumë çështje, që mbulojnë shumë vite dhe që të tjerët kurrë nuk kanë qenë në vullnetin dhe kurajën për t'i zgjidhur", tha Rama. "Unë mendoj se ne jemi shumë afër zgjidhjes së gjithë këtyre çështjeve dhe kjo do të ishte e mrekullueshme", është shprehur Kryeministri Rama. Negociatat mes Shqipërisë dhe Greqisë kanë kaluar në një plan të dytë për fqinjët tanë pas marrëveshjes për emrin që ata arritën me Maqedoninë. Debati politik dhe fati i referendumit për emrin e ri në Maqedoni la në hije negociatat për zgjedhjen e problematikave që prekin një histori 70vjeçare mes dy vendeve. Negativisht në këtë ecuri të negociatave, ku grupet negociatore të të dy ministrive të Jashtme ishin duke punuar me draftin përfundimtar, luajti dhe dorëheqja e ministrit të Jashtëm grek, Nikos Kotzias. Kotzias ishte personi që prej pesë vitesh kishte punuar për të arritur një marrëveshje të re me Shqipërinë për përcaktimin e kufirit detar me Shqipërinë, por dhe heqjen e Ligjit të Luftës mes dy vendeve. Detyrën e ministrit të Jashtëm tani e mban Kryeministri Tsipras. Por padyshim ngjarja e Bularatit, ku mbeti i vrarë një minoritar grek Kostantinos Kaçifas pas sulmit ndaj Policisë shqiptare dhe shpallja non grata të 52 shtetasve grekë, mes të cilëve dhe eurodeputeten qipriote Eleni Theocharous, kanë çuar në një "ngrirje" të negociatave, por dhe të dialogut me Greqinë.