Vrasja e ekstremistit grek në Bularat, shkëmbeu zjarr me forcat RENEA
Konstantinos Kaçifas u vra nga forcat RENEA, pasi 35vjeçari nuk iu bind thirrjes për t'u dorëzuar dhe nisi të qëllonte me armë zjarri ndaj tyre. Ngjarja ndodhi më 28 tetor dhe e pati zanafillën fillimisht rreth orës 10: 00, kur në krye të fshatit Bularat, shtetasi Kostantinos Kaçifas ka qëlluar me armë zjarri në ajër. Menjëherë në drejtim të vendit nga vinin të shtënat kanë shkuar shërbimet e Policisë, të cilat ishin të dislokuara në qendër të fshatit sepse do zhvillohej aktivitet me rastin e festës së Greqisë. Kaçifas, porsa ka parë shërbimet e Policisë që po afroheshin në drejtim të tij, ka hapur zjarr me breshëri ndaj tyre duke iu rrezikuar jetën. Fatmirësisht, nga të shtënat nuk pati punonjës policie të plagosur, por është thyer xhami i mjetit të Policisë. Policia menjëherë ka rrethuar zonën, ku përsëri ai ka hapur zjarr në drejtim të efektivëve. Duke e vlerësuar situatën si mjaft të rrezikshme, është kërkuar ndërhyrja e forcave më të specializuara. Në vend mbërritën forca të RENEA- s, të cilëve thirrjes për t'u dorëzuar i riu iu përgjigj me zjarr. Nga shkëmbimi i zjarri mbeti i vrarë 35- vjeçari, ndërkohë që ngjarja solli reagime të ashpra nga Greqia. Viktima jetonte në Greqi dhe kishte rreth një javë që kishte ardhur në Bularat.
Pas ngjarjes, babai i ekstremistit grek e lidhi ngjarjen me bindjet e tij nacionaliste. Janis Kaçifas, duke folur për mediat greke, ka theksuar se Konstantini ishte i ndikuar nga ndjenjat patriotike. Siç tregon ai, 35- vjeçari u frymëzua nga lufta e ushtarëve grekë ndaj forcave fashiste italiane gjatë viteve 1940-' 41 dhe se ai mbështeste idenë që Epiri i Veriut ishte pjesë e territorit të Greqisë. "Konstantinos u inspirua nga ushtarët grekë që u vranë në Epirin e Veriut në ' 40-' 41. Ai ishte i inspiruar aq sa nuk ndahej dot nga flamuri grek", deklaroi babai duke folur për gazetën greke "Protothema". Më tej, Janis Kaçifas nënvizonte se i biri kishte shkuar në Greqi 5 vite më parë për të punuar dhe kur ishte kthyer, ngriti flamurin grek në kodrën ku grekët u vranë në Luftën e Dytë Botërore dhe në vendin ku u vra dhe ai vetë. "Kur u kthye nga Greqia, ai ngriti flamurin grek ku u vranë ushtarët dhe tha se ndihej grek. Ai donte të qëndronte në Bularat sepse kishte ndjenja patriotike për helenizmin. Ai denonconte statusin e një bote sovrane, që nuk mbrojti dot Vorio Epirin", ka deklaruar babai i 35- vjeçarit.