“Venecia” për vetingun në politikë: Ta zgjidhë Kuvendi me dialog
Qëndrime të kundërta në mbledhjen e Këshillit të Legjislacionit
Këshilli i Legjislacionit u mblodh dje për të shqyrtuar mendimet e konstitucionalistëve të partive politike përsa i përket propozimit të opozitës për vetingun në politikë.
Eksperti i Partisë Socialiste, Artur Metani, njëkohësisht edhe Avokati i Shtetit, së bashku me këshilltarin ligjor të PD- së, Gazmend Bardhi, u përplasën në mendimet e tyre përsa i përket projektligjit për vetingun në politikë.
QËNDRIMET Eksperti i PS- së Artur Metani gjatë fjalës së tij para të pranishmëve u shpreh se propozimi i opozitës ka paqartësi se cila do jetë struktura që do bëjë procesin e vetingut. Ai tha se projektligji nuk është në përputhje me Konventën Ndërkombëtare të të Drejtave të Njeriut. “Bazuar në analizën e mësipërme mbi propozimin për të bërë shtesa dhe ndryshime në Kushtetutën e Shqipërisë, me qëllim realizimin e vetingut për politikanët dhe disa zyrtarë të lartë shtetërorë, në gjykimin tonë, projektligji i propozuar paraqet mangësi në drejtim të parashikimit në nivel kushtetues të mënyrës së zbatimit të procesit të garantimit të integritetit të funksionarit publik; kufizim të të drejtave themelore të subjekteve, mbi të cilët parashikon të shtrijë efektet, pa respektuar parimin e proporcionalitetit; mundësi për dublim në mënyrë të papërshtatshme dhe pengim të zbatimit të dispozitave që rregullojnë funksionimin e gjykatave të posaçme, Prokurorisë së Posaçme dhe Byrosë Kombëtare të Hetimit, ILDKPKI- së, të institucioneve përgjegjëse që merren me procesin e dekriminalizimit”, tha Metani.
Ndërkohë, Gazmend Bardhi, eksperti i Partisë Demokratike, tha se kufizimi me ligj i të drejtave të caktuara politike është i pranueshëm nëse kufizon influenca, qoftë kriminale. “Masa e propozuar është e nevojshme dhe legjitime meqë Shqipëria aplikon sistemin zgjedhor të zgjedhjes së kandidateve për deputetë me lista të mbyllura. Qëllimi i kufizimeve ka për qëllim mbrojtjen e institucioneve nga ndikimi i krimit të organizuar. Amendamenti kushtetues nuk parashikon organin që do bëjë verifikimin. Nënkuptohet se do ketë një organ ekzistues kushtetues. Organi që do bëjë verifikimin, do caktohet me ligj. Jo çdo kontakt mund të konsiderohet i paligjshëm. Prandaj, do të jetë ligji që do hartohet nëse miratohen ndryshimet, që do të përcaktojnë se cilat do konsiderohen kontakte të papërshtatshme”, tha Bardhi. VOTIMI Pas prezantimeve të bëra nga dy ekspertët, kryetari i Kuvendit, Gramoz Ruçi, kërkoi që mbledhja të vijojë me dyer të mbyllura për të diskutuar mbi procedurën që do të ndjekë Këshilli i Legjislacionit mbi propozimin e opozitës mbi vetingun në politikë. Arsyeja tjetër e kërkesës së Ruçit ishte materiali që ai mbante në dosjen e tij të kuqe, ku qëndronte opinioni paraprak i Komi- sionit të Venecias, i cili është edhe qëndrimi që mund të çojë në kapërcimin e ngërçit politik në vend. Por me kërkesë të opozitës mbledhja vijoi me dyer të hapura, ku kreu i Kuvendit kërkoi dakordësi ndërmjet PD- së dhe PSsë për kalendarin e punimeve në mënyrë që kjo çështje të votohet brenda muajit dhjetor. “E zhvillojmë dot mbledhjen ditën e premte, kësaj jave, për të kapur kalendarin në përputhje me Kushtetutën jo më pak se dy javë dhe jo më shumë se tre javë”, u shpreh Ruçi. Kërkesës së tij iu përgjigj menjëherë deputeti i PD- së, Alibeaj i cili kërkoi që nisma e opozitës të votohet sa më parë.