Opozita rikthehet në Kuvend pas dy muajsh
Deputetët e PD- LSI marrin pjesë në mbledhjet e Komisionit
Mbledhja e djeshme e Këshillit të Legjislacionit riktheu opozitën në Parlament. Mbledhja ishte njoftuar nga shërbimet e Kuvendit, ku u prezantuan qëndrimet e palëve politike, përsa i përket nismës së opozitës për të ndryshuar Kushtetutën në mënyrë që të miratohet vetingu në politikë. Sipas Rregullores së Kuvendit, ndryshimet kushtetuese shqyrtohen nga Këshilli i Legjislacionit së bashku me Komisionin e Ligjeve. Në mbledhjen e djeshme u rikthyen në Kuvend deputetët e opozitës, të cilët prej disa muajsh ishin në bojkot parlamentar. Konkretisht, deputetët e Partisë Demokratike, Enkelejd Alibeaj, Gent Strazimir, Oerd Bylykbashi si edhe deputetët e LSIsë, Nasip Naço, Edmond Haxhinasto dhe Silva Caka u rikthyen në Kuvend. Mbledhja e fundit e Këshillit të Legjislacionit u bë më 26 tetor, ku i pranishëm ishte vetëm deputeti i PD- së, Ervin Salianji. Që me fillimin e sesionit parlamentar në shtator, Partia Demokratike nisi bojkotin e saj parlamentar, duke shprehur qëndrimin se politika ka lidhje me botën e krimit. Për këtë, Partia Demokratike dhe Lëvizja Socialiste për Integrim propozuan një projektligj për ndryshime kushtetuese, ku parashikohej që edhe për politikanët të zhvillohet një proces vetingu njësoj si me gjyqtarët dhe prokurorët. Por Partia Socialiste nuk e futi menjëherë në shqyrtim kërkesën, duke u shprehur se për këtë çështje do të marrë mendimin e Komisionit të Venecias, pasi parashikohet ndryshimi i Kushtetutës. Pas kalimit të tre muajve pritet që kjo çështje të kalojë për votim në fund të dhjetorit, që përkon edhe me mbylljen e këtij sesioni parlamentar.