Berisha: Hakmarrje e verbër raciste për ekzekutimin e Kaçifas

Ish- Kryeministri Sali Berisha i sheh vrasjet e fundit të shtetasve shqiptarë të ndodhura në Greqi si hakmarrje për ngjarjen e ndodhur pak kohë më parë, kur një minoritar humbi jetën gjatë një përplasjeje me Policinë. Berisha kujton se pas vrasjes së ekstremistit grek Kostandin Kaçifas nga Policia shqiptare në Greqi, kanë nisur ekzekutime të shqiptarëve në disa zona të ndryshme të shtetit grek. Për ish- Kryeministrin, deri tani janë regjistruar 7 vrasje gjakftohta të bazuara në urrejtjen dhe racizmin primitiv ndaj shqiptarëve. "Pas vrasjes në shkëmbim zjarri nga Policia shqiptare të ekstremistit grek nga Bularati, Kostandin Kaçifas, në vendin fqinj, në hakmarrje të verbër raciste e primitive, ka shpërthyer një serial vrasjesh të shqiptarëve në tërësi. Kështu, në një hark kohor prej pak javësh, janë ekzekutuar në zona dhe rrethana të ndryshme të Greqisë 7 shqiptarë, që të gjithë, përveç njërit, ekzekutime gjakftohta të bazuara në urrejtjen dhe racizmin primitiv ndaj shqiptarëve dhe si hakmarrje, akte kriminale albanofobie", shkruan Berisha në një reagim për ngjarjet e ndodhura në shtetin grek. Për të njëjtat shkaqe, Berisha beson se është kryer edhe vrasja e 18- vjeçarit shqiptar, Marios Isak, të ekzekutuar në Kavalla. "Në Kavalla u regjistrua viktima e 7- të, u gjet i vrarë një 18- vjeçar, djalë i një familjeje emigrantësh shqiptare, anëtar i një ekipi lokal futbolli, për të cilin shkaku i vetëm, sipas mediave, mbetet racizmi", thekson ish- Kryeministri. Berisha i ka bërë thirrje Komisionit të të drejtave të Njeriut të OKB, Këshillit të Europës, të reagojnë dhe të ndërhyjnë pranë autoriteteve greke për një hetim të pavarur. "Dënoj me ashpërsinë më të madhe këto akte kriminale të mirëfillta raciste dhe i bëj thirrje Komisionit të të Drejtave të Njeriut të OKB, Këshillit të Europës, Komisionit dhe Këshillit të Ministrave të BE, të ndërhyjnë pranë autoriteteve greke për një hetim të pavarur mbi shkaqet dhe rrethanat e ekzekutimeve raciste të shqiptarëve në Greqi dhe të ushtrojnë të gjithë presionin e merituar ndaj autoriteteve greke që këto akte kriminale të shëmtuara të ndëshkohen", thekson ish- Kryeministri. Reagimi i Berishës erdhi menjëherë pas ngjarjes së raportuar në mediat greke, ku një 18- vjeçar i lindur dhe banues në Kavalla, Greqi, u qëllua me një plumb në gjoks, duke mbetur i vdekur në vend.