Studentët në protestë: Të ulen tarifat e shkollimit

"Të anulohet vendimi për tarifimin e provimeve të mbartura"

Bojkot mësimit, protestë dhe katër kërkesa në adresë të Ministrisë së Arsimit.

Dhjetëra studentë të Universitetit të Tiranës dhe Politeknikut janë bërë bashkë dje duke kërkuar ulje të tarifave të shkollimit, anulimin e vendimit numër 288, në të cilin parashikohet tarifë për provimet e mbartura, shlyerje të detyrimit vjetor nëpërmjet skemës së pagesës me këste, konkretisht, në janar dhe qershor pa cenuar sezonin e provimeve, si edhe përmirësimin e kushteve në konvikte. Janë këto kërkesat kryesore të studentëve drejtuar ministres së Arsimit, Lindita Nikolla. Për afro 6 orë ata kanë qëndruar përpara godinës së Ministrisë, në rrugën e Durrësit, duke ripërsëritur thirrjen se nuk do të largoheshin prej aty pa marrë zgjidhje konkrete nga ana e ministres. Edhe pse kishin paralajmëruar se nuk do të ishte një protestë e dhunshme, në drejtim të godinës u hodhën stilolapsa dhe vezë. Protesta e studentëve solli edhe bllokimin e rrugës për disa orë, duke detyruar uniformat blu të devijonin qarkullimin e automjeteve në akse dytësore.

PROTESTA "Ulni tarifat, "Kjo është vjedhje, shpërdorim, dhunë që ushtrohet mbi çdo student". "Paguajmë tarifat më të larta në Europë", "Studentët e bashkuar kanë për të fituar". Ishin këto disa nga thirrjet që shoqëruan protestën e djeshme të studentëve. Që në nisje ata kërkuan takim me ministren Nikolla. Në përgjigje të kërkesës së tyre, doli zv. ministrja Besa Shahini, e cila kërkoi një përfaqësi të studentëve për t'u takuar me ministren. Por studentët e refuzuan në mënyrë kategorike këtë. Ata thanë se nuk do të ulen të negociojnë dhe se presin zgjidhje për secilën nga kërkesat e tyre. E gjendur në këto kushte, Shahini kërkoi nga studentët që të dorëzojnë në Ministri listën me kërkesat që ato kanë, gjë për të cilën u dakordësuan edhe studentët. Ata listuan kërkesat, duke nisur nga ulja e tarifave të shkollimit, pagesa e tarifës me dy këste deri edhe tek anulimi i vendimit për të mos u tarifuar për provimet e mbartura si edhe përmirësimi i kushteve në konvikte.

QËNDRIMI Qëndrimi që ministrja Nikolla mbajti përkundrejt kërkesave të tyre nuk i bindi studentët që të tërhiqen nga protesta. Ata paralajmëruan se edhe sot do të jenë përpara Ministrisë, duke paralajmëruar se nuk do të tërhiqen pa marrë zgjidhje. "Nesër në orën 8: 00 të mëngjesit, studentët e të gjitha universiteteve publike do të bojkotojnë sërish mësimin, duke u grumbulluar në oborret e fakulteteve përkatëse për të marshuar drejt Minis- trisë së Arsimit. Në orën 10: 00 protestojmë përpara Ministrisë deri në plotësimin e të gjitha kërkesave", thuhet në njoftimin e shpërndarë në rrjetet sociale. Protestës së djeshme iu bashkuan edhe studentët në universitetin "Aleksandër Xhuvani" në Elbasan.