PROJEKTLIGJI “PËR MBROJTJEN SOCIALE”
Neni 11 Pagesa e ndihmës ekonomike
1. Ndihma ekonomike është një pagesë e kufizuar në kohë, që jepet në formën e një shpërblimi mujor në lekë, për kategoritë e përcaktuara në nenin 6 të këtij ligji. Kufizimi në kohë i ndihmës ekonomike bëhet sipas përcaktimeve me Vendim të Këshillit të Ministrave.
Neni 12 Pagesa e aftësisë së kufizuar
1. Pagesa për personat me aftësi të kufizuar jepet çdo muaj për këta individë dhe për ndihmësit personalë tyre, në masën e përcaktuar me vendim të Këshillit të Ministrave. 2. Përfituesve, të klasifikuar me Vendim të Komisionit në grupet e Aftësisë së Kufizuar, u ndërpritet pagesa pas 48 muajve punësimi. Procedurat në rastet e rikthimit në skemën e përfitimit të pagesës së aftësisë së kufizuar përcaktohen me vendim të Këshillit të Ministrave.
KRITERET DHE PROCEDURA E PËRFITIMIT NGA PROGRAMET E MBROJTJES SOCIALE Neni 14 Përfitimi dhe përjashtimi nga ndihma ekonomike
1. Ndihma ekonomike, që përfitojnë familjet dhe individët në nevojë, është e plotë. Ndihmë ekonomike përfitojnë familjet ose individët që nuk kanë të ardhura ose kanë të ardhura të pamjaftueshme nga programe të mbrojtjes shoqërore, remitancat, qiraja, asetet, bujqësia apo të ardhura të tjera. 2. Përjashtohen nga përfitimi i ndihmës ekonomike, për një periudhë gjashtëmujore, familjet, të cilat kanë në përbërje të tyre edhe një anëtar të vetëm që plotëson kushtet e mëposhtme: a) Kryen ndarje të qëllimshme të anëtarëve të familjes që jetojnë në të njëjtën strehë, kur nuk krijohet një kurorë e re, me përjashtim të rastit vajzë- nënë; b) Nuk tërheq ndihmën ekonomike brenda afateve të përcaktuara me vendim të Këshillit të Ministrave; c) Refuzon verifikimin e situatës social- ekonomike në familje; ç) Fsheh informacionin apo kryen deklarim të rremë; d) Nuk paraqiten për deklarim dhe/ ose nuk deklarojnë ndryshimet e situatës social- ekonomike çdo tre muaj pranë administratorit shoqëror; dh) Refuzojnë përfshirjen në kurset e formimit profesional anëtarët në moshë aktive pune të familjeve përfituese të skemës së ndihmës ekonomike, sipas përcaktimeve të legjislacionit në fuqi për nxitjen e punësimit; e) Nuk rezultojnë punëkërkues të papunë pranë zyrave të punës, të punësuar apo të vetëpunësuar pranë strukturave të tatimeve, anëtarët që janë në moshë aktive pune, të aftë për punë, sipas përcaktimeve të legjislacionit në fuqi për nxitjen e punësimit. Përjashtohen nga ky detyrim anëtarët e familjeve në zonat rurale, që zotërojnë ose jo tokë bujqësore në pronësi/ përdorim, apo familjeve që kanë anëtarë në moshë aktive pune, që ndjekin arsimin e mesëm apo të lartë, por jo më shumë se deri në moshën 25 vjeç. 3. Përjashtohen nga përfitimi i ndihmës ekonomike, për një periudhë njëvjeçare familjet, të cilat kanë në përbërje të tyre qoftë edhe një anëtar të vetëm që plotëson kushtet e mëposhtme: a) është në moshë aktive pune dhe refuzon ofertat e përshtatshme për punë të zyrave të punës, sipas përcaktimeve të legjislacionit në fuqi për nxitjen e punësimit; b) punësohen dhe ndërpresin marrëdhëniet e punës pa shkaqe të arsyeshme, me përjashtim të rasteve kur zgjidhja e kontratës bëhet nga ana e punëdhënësit; c) gjatë verifikimit social- ekonomik rezultojnë me të ardhura dhe kushte shumë të mira social- ekonomike;