Biznesmeni ndërtoi 10 kate pa leje, përfundon në spital
Biznesmeni Bardhok Planaj, i cili u arrestua se ndërtoi pallat 10- katësh me vlerë 2 milionë euro pa leje, është transferuar nga dhomat e paraburgimit në Spitalin e Shkodrës. Burime të Policisë bënë të ditur se Planaj është ankuar për probleme shëndetësore dhe menjëherë është kryer edhe transferimi i tij në reanimacion. Nuk konfirmohet saktësisht nëse biznesmeni ka ndonjë diagnozë specifike, çka ka ndikuar që ai të mos e përballojë dot ambientin e paraburgimit. Por, burime nga spitali thanë se ai është ankuar se nuk ndihej mirë në dhomat e paraburgimit. Duke i parapritë ndonjë problemi të mundshëm me zemrën, është marrë vendimi që ai të dërgohet në spital dhe të marrë trajtimin e duhur mjekësor.
Policia e Shkodrës, pas një hetimi disamujor, arrestoi më datën 3 dhjetor 44- vjeçarin Bardhok Planaj. Sipas njoftimit që dha Policia, arrestimi i tij ka ardhur për shkak se ka ndërtuar një pallat me 10 kate pa leje. Përveç kësaj, ndërtesa me vlerë 2 milionë euro dyshohet se është financuar nga paratë që mund të kenë ardhur si rrjedhojë e aktivitetit kriminal që ka kryer ky shtetas më parë. Lëshimi i urdhrit të arrestimit të tij nga Gjykata e Shkodrës është bërë për tri veprat penale: "Pastrimi i produkteve të veprës penale", "Falsifikimi i vulave, stampave ose formularëve" dhe "Ndërtim pa leje". Prokuroria, në bashkëpunim me Policinë, prej disa muajsh kishin nisur hetime për 44- vjeçarin, i cili tri vite më parë ishte pjesë edhe e debateve politike në vend, pasi i shpëtoi arrestimit në vitin 2015 duke u fshehur në makinën e ish- deputetit Mark Frroku. Përveç kësaj, në fund të vitit 2014, biznesmeni u shpall në kërkim për sasinë rekord të lëndës narkotike prej 800 kg kanabis sativa të kapur në Lagunën e Vilunit në Lezhë, që kishte si destinacion Malin e Zi.
Ndërtesa e ngritur pa leje mësohet se gjendet në lagjen "Rus". Pallati është vendosur në sekuestro, pasi përveçse është ndërtim i paligjshëm, dyshohet se është ndërtuar me para që kanë ardhur nga trafiku u drogës. Ndërtimi është kryer nga firma e Planajt "Old- B", të cilën e pezulloi përkohësisht pasi u shpall në kërkim dhe e riaktivizoi disa muaj më pas, kur arriti të dilte si person i papërfshirë në drogën e kapur në Lagunën e Vilunit.