Vritet futbollisti 18- vjeçar shqiptar në Greqi, reagon ambasadorja në Athinë: Rasti i Korfuzit krim racist
MINISTRIA E JASHTME REAGON PER KATER VRASJET E FUNDIT TE SHQIPTAREVE NE GREQI: TE FRENOHET “AGIMI I ARTE”
Ministria e Jashtme e Shqipërisë, në një reagim të saj pas vrasjes së fundit të 18- vjeçarit shqiptar Marios Isak, i kërkoi autoriteteve greke të frenojnë Agimin e Artë dhe ekstremistët e tjerë që po rrezikojnë jetën e shqiptarëve në Greqi.
Reagimi i fortë i Ministrisë së Jashtme vjen kur brenda dy javëve numërohen katër shqiptarë të vrarë në territorin grek. "MEPJ shpreh indinjatën e thellë për humbjen e jetëve të bashkëkombësve tanë, ndjenja këto që thellohen nga vonesat në zbardhjen e këtyre ngjarjeve nga autoritetet greke", thuhet në reagimin e Ministrisë së Jashtme. Tirana zyrtare i kujton Athinës se nuk mund të pranojë thirrjet ksenofobe ndaj shqiptarëve pa bërë asnjë reagim zyrtar. "MEPJ dënon ashpër sfondin e ekstremizmit dhe gjuhës së urrejtjes që ka shoqëruar këto ngjarje në vendin fqinj dhe u bën thirrje autoriteteve greke për dënimin dhe vënien fre të çfarëdo përpjekjeje të Agimit të Artë apo segmenteve të tjera ekstremiste për të cenuar sigurinë dhe dinjitetin e shqiptarëve, që punojnë e kontribuojnë në vendin fqinj. Nuk pranojmë kurrsesi të mësohemi as me thirrjet e tyre ksenofobe në kanalet e komunikimit dhe as me viktimizimin patetik e nacionalist të ndonjërit syresh, që nuk lë rast pa sulmuar Shqipërinë në instancat europiane", thuhet në reagimin e Ministrisë së Jashtme. Ministria e Jashtme denoncon presionin racist që shqiptarët që banojnë në Greqi po përjetojnë nga burime të ndryshme. "Në kushtet kur bashkëkombësit tanë po ndjejnë trysninë e një fushate të pashpallur urrejtjeje dhe dhune, MEPJ shpreh angazhimin e shtetit shqiptar për t'u dhënë viktimave dhe familjeve të tyre mbështetjen e nevojshme ligjore dhe financiare për të mbrojtur të drejtat e tyre themelore, si pjesëtarë të komunitetit më të madh eu- ropian që jeton, studion dhe kontribuon prej dekadash ne Greqi", vijon deklaratat e Ministrisë sonë të Jashtme. Pas vrasjes së minoritarit nga Bularati, Konstantinos Kaçifas nga Policia shqiptare dhe shpalljen non grata të 52 grekëve nga shteti shqiptar, përfaqësues të partisë ekstremiste Agimi i Artë janë përbetuar se do të reagojnë ashpër ndaj shqiptarëve kudo që ndodhen. Duke informuar për vrasjen e fundit, të ndodhur dy ditë më parë, Ministria e Jashtme e Shqipërisë shpreh shqetësimin se kjo është vrasja e katërt brenda dy javëve. "Ministria e Punëve të Jashtme është njoftuar nëpërmjet ambasadës në Athinë se dje në mbrëmje, më datë 04.12.2018 në zonën e Kavallës, është gjendur i pajetë shtetasi shqiptar Marios Isak i datëlindjes 31.7.2000, lindur në Kavalla, Greqi. MEPJ shpreh keqardhjen e thellë për humbjen e jetës së të riut shqiptar dhe i shpreh ngushëllimet më të ndjera familjes dhe të afërmve të tij. Ambasada e Republikës së Shqipërisë në Athinë është në kontakt me familjen e të ndjerit për ofrimin e asistencës së nevojshme. Kjo është vrasja e katërt e një qytetari shqiptar brenda dy javëve të fundit. MEPJ shpreh shqetësimin për serinë e vrasjes së shqiptarëve në Greqi përgjatë dy javëve të fundit dhe në të njëjtën kohë solidaritetin me familjet e tyre", përfundon deklaratën e saj Ministria e Jashtme.