Protesta e dinjitetit

Panorama (Albania) - - FAQE 1 - DR. BRUNILDA LABOVITI

Dje studentët dhe të rinjtë shqiptarë treguan që nuk janë të nënshtruar dhe kanë dinjitet. Na bëjnë dhe vazhdojnë të na bëjnë të gjithë krenarë. Intensifikimi spontan i protestës si një reagim qytetar dhe europian i studentëve pasqyron dhe njëherë tjetër frymën e re që premton ndryshime rrënjësore në vend.

Unë jam pedagoge në Psikologji në Fakultetin e Shkencave Sociale në Universitetin e Tiranës prej më shumë se tetë vitesh dhe shikoj sesi degradon sistemi universitar dhe sesi braktisen e zbrazen auditorët me një dëshirë të pashembullt të studentëve për t’u larguar një orë e më parë nga Shqipëria. Arroganca dhe shpërfillja e demonstruar nga institucionet kompetente ndaj kërkesave periodike të studentëve, e ka deformuar zhvillimin e tyre të rregullt profesional. Përpos angazhimit akademik shumë të rënduar, studentët gjatë gjithë kohës përballen dhe me problemet e tyre financiare, xhepat e të cilëve universitetet përpiqen t’i shtrydhin sa më shumë të jetë e mundur.

Rinia e këtij vendi tregoi sot që është e tashmja dhe jo e ardhmja. Përmes një çiltërsie dhe dëshire për të kthyer në favor të tyre situatën studentore, si në çdo vend të civilizuar e të konstruktuar për t’iu shërbyer qytetarëve, zhurma e shkaktuar nga ky brez studentor po dëgjohet si asnjëherë tjetër që nga koha e rrëzimit të sistemit të shkuar totalitar. Të gjithë aktivistët në këto tubime mëse paqësore duken më të bash- kuar, më këmbëngulës dhe më suportues se kurrë me njëri- tjetrin, për një kauzë mëse të drejtë e të ndershme. Të kesh një tarifim shkollor është mëse normal, por që tarifa të jetë përtej mundësive financiare të studentëve, kjo është realisht anormale dhe e turpshme; ku shtresa me kredibilitetin më të lartë në shoqëri të jetë kaq e diskriminuar në çdo aspekt dhe pa kurrfarë përkrahjeje.

Energjia dhe vendosmëria që shfaqën studentët këto ditë ngjall shpresë se do të ketë një revolucion prej themeleve në sistemin arsimor për të modernizuar universitetet. Një model akademik cilësor dhe i mirëstrukturuar garanton një shoqëri të emancipuar dhe të shëndetshme për të ardhmen.

Newspapers in Albanian

Newspapers from Albania

© PressReader. All rights reserved.