Qeveria tërhiqet, shfuqizon VKM për tarifat e provimeve
Rama publikon videon: Po investojmë 18.8 milionë euro në konvikte
Këshilli i Ministrave shfuqizoi dje dhe e publikoi menjëherë në Fletoren Zyrtare pikën 4 të VKM- së, që përcaktonte tarifat për provimet e prapambetura.
Qeveria miratoi dje një ndryshim në vendimin nr. 288, datë 21.5.2018 për “Miratimin e kufirit maksimal të tarifës vjetore të shkollimit për studentët që ndjekin studimet në institucionet publike të arsimit të lartë, në një program të ciklit të parë të studimeve, në një program të integruar të studimeve ose në një program të studimeve profesionale me kohë të plotë”. Vendimi për shfuqizimin e pikës 4 të kësaj VKMje u mor pas propozimit të Ministrisë së Arsimit, Sportit dhe Rinisë. Ministrja Nikolla informoi studentët për shfuqizimin e pikës 4 të VKM- së nr. 288, sipas të cilit studentët nuk do t’i nënshtrohen tarifës së shkollimit për provimet e prapambetura. Ndërkohë, për zbatimin e këtij vendimi, i cili hyn në fuqi pas botimit në Fletoren Zyrtare, ngarkohen Ministria e Arsimit, Sportit dhe Rinisë dhe institucionet publike të arsimit të lartë. Ministrja e Arsimit dhe Sportit, Lindita Nikolla, deklaroi dje se do të hiqet neni 4 i Vendimit të Këshillit të Min- istrave dhe nuk do të ketë tarifë për provimet e prapambetura. “Pra, nuk do të ketë kosto shtesë për studentët përsëritës që mbartin provimet nga një vit i mëparshëm”, tha Nikolla. Nikolla iu përgjigj dhe kërkesës tjetër të studentëve protestues për të qenë pjesë e bordeve të administrimit. “Kjo është një praktikë e paparë, në asnjë vend të Bashkimit Europian nuk ka në bordin e administrimit, aty ku menaxhohen financat, përfaqësues të studentëve”. Ndërkaq po dje, në pikun e debatit për kushtet e studentëve, Kryeministri Rama publikoi një video me pamje dhe të dhëna lidhur me investimin që po bëhet në godinat e Qytetit Studenti në Tiranë. Sipas Kryeministrit, janë 18.8 milionë euro që po investohen nga qeveria gjermane përmes bankës KFW. Sipas Kryeministrit, bëhet fjalë për sistem termoizolim, dyerdritare, ambientet e brendshme, sistem ngrohjeje nga dyshemeja, prodhim uji të ngrohtë sanitar, pompat e nxehtësisë dhe panelet diellore të instaluara në tarraca. Deri tani janë përfunduar dy godina dhe dy të tjera janë në fazën finale të rikonstruksionit. Janë 236 dhoma akomodimi për studentët në këto konvikte dhe 1088 studentë përfitues nga ambientet e reja të rikonstrukturuara. Faza e dytë përfshin rinovimin e deri 9 godinave të Qytetit Studenti Nr. 1 në Tiranë, ku do të jenë 1800 studentë të tjerë përfitues nga rikonstruksionit.