Zhduket asfalti, rruga për Shijak gati e pakalueshme
Aksi vetëm 5 km gjithë gropa, s’është vënë dorë asnjëherë
Segmenti pesë kilometra i gjatë, që lidh Durrësin me Shijakun, është bërë i pakalueshëm. Ky aks nacional po shkon drejt degradimit të plotë, pasi prej shumë vitesh nuk njeh asnjë investim.
Kjo rrugë përshkohet në të dyja anët e saj nga banesa dhe biznese, duke u konsideruar ndër akset me përqendrimin më të madh të zhvillimit ekonomik. Por krahas saj, ndër vite askush nuk është kujdesur për mirëmbajtjen apo rehabilitimin e rrugës. Gropa, kanale, devijime, pellgje me ujë shoqërojnë segmentin përgjatë gjithë gjatësisë së tij. Drejtuesit e automjeteve e kanë thuajse të pamundur të mos shkatërrojnë makinat e tyre nëpër gropa, pasi këto të fundit janë të shpeshta dhe në raste shiu edhe të padukshme. Në shumë raste, aksidentet kanë qenë prezente dhe kjo për faj të rrugës. Gropat në rrugë krijojnë lëvizje të pakontrolluara të mjeteve, pasi drejtuesit me zigzage në rrugë rrezikojnë njëri- tjetrin. Kjo shkakton edhe deri në daljen nga rruga të makinave, duke rrezikuar jetën e qytetarëve.
Nga “Kodra e Rrashbullit” e deri në afërsi të “Katër Rrugëve” aksi është totalisht i amortizuar dhe i pakalueshëm. Përveçse emërtimit, asgjë tjetër nuk ngjan me një rrugë nacionale. Ky segment 5 kilometër i gjatë, por mjaft i rëndësishëm, është lënë në harresë të plotë. Që prej ndërtimit të autostradës Ti- ranë- Durrës, rruga për në Shijak është anashkaluar nga autoritetet. Asfalti i hedhur dekada më parë po shkon drejt zhdukjes.
“Këtu prej vitesh askush nuk investon. Gropat janë aq të mëdha, saqë makinat thuajse mund të fiken. Shmangia e dëmtimit të asfaltit në jo pak raste është bërë shkak për aksidente. Në këtë rrugë të rëndësishme jo vetëm për komunitetin e zonës, por edhe për bizneset e ngritura në të dy krahët e saj, nuk ka ndriçim. Sinjalistika vertikale dhe horizontale mungon. Sistemi i kanalizimeve anësore mbetet një tjetër problem”, shprehen banorët e zonës dhe drejtuesit e automjeteve që përshkojnë këtë segment rrugor. Rruga kombëtare Shijak- Durrës është me rëndësi jetike, jo vetëm për të lidhur banorët e dy qendrave urbane dhe fshatrave përgjatë rrugës, por edhe për qindra biznese me pronësi shqiptare e të huaj, që operojnë pranë saj. Me dhjetëra herë, banorët e zonës dhe drejtues automjetesh janë ngritur në protestë, por ankesat e tyre kanë rënë në vesh të shurdhër.
Banorët bëjnë apel për ndërhyrje sa më të shpejtë, pasi sipas tyre, po iu shkatërrohen mjetet dhe ky aks është kthyer në makth për çdo drejtues.