Protesta, organizatorët të ndarë: Nuk kemi punë me Lëvizjen për Universitetin

Në turmën gjigante të studentëve protestues është thuajse e pamundur të depërtohet e jo më të gjesh një organizator të saj. Në fakt nuk janë një, por disa, mes të cilëve edhe Lëvizja për Universitetin. Ndonëse në asnjë moment nuk është shprehur publikisht si përfaqësuese kryesore dhe të marrë meritat e një lëvizjeje të tillë shpresëdhënëse, ajo ka qenë një ndër faktorët që u ka dhënë zë studentëve në ditët e para të protestës, duke kontribuar me ndarjen e njoftimeve e lajmeve në kohë rekord. Por jo vetëm. Vargjet e thurura për universitet cilësor ( që sigurisht vlejnë sot e mot) janë kryefjala e revoltave të këtyre ditëve. “Jam student i revoltuar/ prej sistemit varfëruar/ refuzoj të jem e ardhmja, që nga sot do jem e tashmja. Duam bursë, duam banesë/ kushte të mira për jetesë. Duam punë, duam dije/ jo pallavra qeverie”. Mjafton të kesh qenë në vetëm një nga protestat e shumta të viteve të fundit para Kuvendit, Kryeministrisë a Ministrisë së Arsimit ( që nuk mblidhnin më shumë se 50 persona) për të kujtuar dystrofëshin e cituar më sipër. E po ashtu, shumë prej ideve të pankartave për arsim falas kanë qenë gati, ndërkohë që kërkesa e sinqertë e studentëve është për përgjysmim tarife. Po kush fshihet pas kësaj lëvizjeje?! Të rinj, shumica tashmë ish- studentë, të angazhuar pranë Lëvizjes për Universitetin, simotër e Organizatës Politike. Kjo e fundit ka lindur pas ngjarjeve të 21 janarit 2011, por është bërë e njohur për rezistencën kundër ligjit për arsimin e lartë. Brenda saj aderojnë të majtë radikalë të vendosur për shndërrime rrënjësore, që synojnë të arrijnë qëllimet e tyre përmes politizimit të çështjeve duke përdorur organizimin e popullit. Si duket, ky fakt nuk u ka pëlqyer të rinjve të vendosur për arsim cilësor larg çdo ngjyrese politike. “Nuk kemi punë me Lëvizjen për Universitetin. Ata janë këtu dhe mund të marrin altoparlantin si kushdo tjetër që dëshiron, qoftë student, pedagog a kalimtar i thjeshtë. Kemi ardhur këtu me iniciativën tonë, pasi na janë bërë shumë padrejtësi nga Ministria. Nuk kemi ndërmend të ndalemi”, thotë një përfaqësues i këshillit studentor në Universitetin Bujqësor të Tiranës, i vendosur për të mos lejuar që kjo protestë “të grabitet” nga asnjë lloj organizate. Sakaq, në rrjete sociale i bëhet thirrje kësaj lëvizjeje dhe kryesuesit të saj t’i qëndrojë larg. “Arlind Qori dhe Lëvizja për Universitetin nuk ju takon ju të vendosni ku dhe si bëhet protesta. Ajo është e studentëve dhe ju nuk jeni student”.