ARRSH pezullon aktivitetin ndërtimor të “DH Albania”
“Në rast se del i vërtetë, zgjidhim kontratën me konsorciumin”
Autoriteti Rrugor Shqiptar njoftoi ditën e djeshme se ka vendosur të pezullojë aktivitetin ndërtimor të dy kompanive “Biba X” dhe “DH Albania” për një pjesë të Unazës së Re, ku kanë dalë fitues të tenderit. Vendimi vjen pas publikimit të disa dokumenteve që dyshohet se janë falsifikuar nga ana e kompanisë amerikane “Dunwell Haberman”, filial i së cilës është “DH Albania”. ARRSH- ja tha dje përmes një deklarate për mediat se konsorciumi “Biba X” dhe “DH Albania” i kishin paraqitur dokumentet konform rregullave dhe se “nuk ka pasur ndonjë indicie që të vinte në dyshim vërtetësinë e tyre”. ARRSH- ja tha se do t’u drejtohet zyrtarisht autoriteteve amerikane dhe nëse manipulimi rezulton i vërtetë, atëherë do të zgjidhë kontratën në mënyrë të njëanshme dhe do ndjekë procedurat e tjera të përcaktuara në ligj. Në rast të zgjidhjes së kontratës, ARRSH- ja do të rifillojë menjëherë procedurat e prokurimit për këtë lot për të mundësuar përfundimin në kohë të projektit. Në garën për Lotin I të projektit të Unazës së Re, dega shqiptare e kompanisë amerikane, “DH Albania”, është regjistruar në Shqipëri në muajin korrik të këtij viti, pak përpara se të hapej tenderi. Përfaqësuesi i saj është një 26vjeçar shqiptar, Avdiol Dobi. “DH Albania” dhe “Biba X” fituan me një ofertë që përfaqëson gati 45 për qind të të gjithë investimit, ose pak më shumë se 18 milionë euro.
“ARRSH- ja u është drejtuar institucioneve që përmes komuni- kimit me rrugë zyrtare t’u kërkohet autoriteteve të Shteteve të Bashkuara të Amerikës për të verifikuar dokumentet e paraqitura në institucionet shqiptare nga kompania në procedurën e garës. Deri në sqarimin e situatës dhe përgjigjen nga autoritetet amerikane nuk do të vijohet me aktivitetin ndërtimor të kësaj kompanie për Lotin Nr. 1 të segmentit, që shtrihet nga Ura e Lanës deri te Mbikalimi i sheshit ‘ Shqiponja’. Në rast se autoritetet amerikane do të konfirmojnë zyrtarisht pretendimet për falsifikime dokumentacioni nga kjo kompani, në zbatim të përcaktimeve ligjore, Autoriteti Rrugor Shqiptar do të zgjidhë kontratën në mënyrë të njëanshme dhe do të ndjekë procedurat e tjera të përcaktuara në ligj. Në rast të zgjidhjes së kontratës, ARRSH- ja do të rifillojë menjëherë procedurat e prokurimit për këtë Lot për të mundësuar përfundimin në kohë të këtij projekti të rëndësishëm për kryeqytetin”, shkruan deklarata.