Reagon SHBA, presim zgjedhjen e KLGJ dhe KLP

Shtetet e Bashkuara të Amerikës presin që javës tjetër të ngrihet Këshilli i Lartë i Prokurorisë dhe Këshilli i Lartë Gjyqësor. Pak orë pas hedhjes së shorit ku u zgjodhën anëtarët e Këshillit të Emërimeve në Drejtësi, ambasada e Shteteve të Bashkuara në Tiranë, përmes një postimi në faqen e saj në rrjetin social “Facebook” kërkoi nga ana e gjyqtarëve dhe prokurorëve ngritjen edhe të dy institucioneve të tjera të drejtësisë. “Këtë vit, Ambasada e SHBA- ve iu ka bërë thirrje gjyqtarëve dhe prokurorëve të ndershëm, patriotë dhe me integritet për t’i shërbyer vendit të tyre në Këshillin e Lartë Gjyqësor dhe Këshillin e Lartë të Prokurorisë. Me formimin e këtyre dy institucioneve të drejtësisë në horizont, Shqipëria është në prag të krijimit të një sistemi drejtësie që u shërben vërtet interesave të qytetarëve të saj. Javën e ardhshme presim me kënaqësi përzgjedhjen e anëtarëve, të cilët kanë kaluar tashmë vetingun, duke shënuar kështu hapin tjetër madhor drejt drejtësisë së vërtetë”, thuhet në reagimin e ambasadës amerikane në “Facebook”. Shtetet e Bashkuara të Amerikës kanë qenë partneri që ka investuar shumë në procesin e reformimit të sistemit të drejtësisë në Shqipëri. Ajo dha asistencë politike përmes ish- ambasadorit Donald Lu, si edhe mbështetje financiare dhe ekspertizë përmes misionit OPDAT.