Kokainë “Guçi”, arrestohen 4 shpërndarës me 1 kg drogë
Operacioni “Flex” godet rrjetin e shitjes së lëndës narkotike
Katër persona u arrestuan pasditen e djeshme në Tiranë nga forcat e Antidrogës, në kohën kur po bënin shkëmbimin e lëndës narkotike të llojit kokainë, në afërsi të bulevardit të ri.
Policia tha se operacioni i koduar “Flex” u realizua nga Seksioni për Hetimin e Narkotikëve në bashkëpunim me Seksionin e Forcës së Posaçme të Operacioneve Speciale dhe Prokurorinë e Tiranës. Gjatë tij u arrestuan 4 të dyshuarit, të cilëve iu sekuestrua një kg kokainë. Lënda narkotike, që dyshohet se do të shitej në zona të ndryshme të Tiranës, u gjet e futur në një çantë me mbishkrimin “Guçi”. Policia tha se në pranga kanë rënë Julian Zela, 36 vjeç, Sajmir Hoxha, 44 vjeç, Besnik Mansaku, 43 vjeç dhe Rezart Hoxholli, 36 vjeç, të gjithë banues në Tiranë. Burimet saktësuan se për këta shtetas disponohej informacion se në bashkëpunim me njëri- tjetrin merreshin me aktivitetin e kundërligjshëm të shitjes së lëndës narkotike të llojit kokainë. Ata u konstatuan nga shërbimet e Policisë në rrugën “Janko Theodhosi”, që ndodhet mes rrugës “Siri Kodra” dhe asaj “Karl Gega”, në afërsi të bulevardit të ri. Gjatë kontrollit të ushtruar, shtetasit Julian Zela i është gjetur brenda një çante dore një qese me lëndë të dyshuar narkotike, e llojit kokainë. Gjithashtu janë ushtruar kontrolle në banesat e këtyre shtetasve, ku janë sekuestruar një palë pranga dhe një mjet prerës. “Është sekuestruar në total ( nga kontrolli fizik dhe kontrolli i ushtruar në banesat e këtyre shtetasve) 1 kg lëndë narkotike e dyshuar e llojit kokainë, një thikë, 4 celularë dhe një palë pranga”, tha dje zyrtarisht Policia e Tiranës.