I vuri flakën vetes me benzinë, gjendet i vdekur 67- vjeçari

TIRANE – Një 67- vjeçar nga Shkoza është gjetur i vdekur dhe thuajse i karbonizuar pranë varrezave të Sharrës në Tiranë. Trupi i pajetë është konstatuar nga banorët e zonës pasditen e djeshme dhe menjëherë është lajmëruar Policia. Në vendin e ngjarjes kanë shkuar menjëherë shërbimet e Komisariatit Nr. 6, që kanë kryer veprimet e para në vendin ku u gjet i pajetë shtetasi, që më vonë u identifikua nga Policia. Burimet thanë se viktima është 67- vjeçari me inicialet J. K., banues në Shkozë. Sipas të dhënave paraprake, nga veprimet e grupit hetimor, të ekspertëve kriminalistë dhe atyre mjeko- ligjorë, dyshohet se viktima i ka vënë flakën vetes me benzinë. Ndërsa rrethanat e ngjarjes apo motivet ende nuk janë përcaktuar nga Policia. Fillimisht ai është transportuar drejt Institutit të Mjekësisë Ligjore, i paidentifikuar, ndërsa emri i tij është mësuar më vonë. Kanë qenë familjarët ata që janë paraqitur në morg, kur kanë mësuar ngjarjen nga televizionet, ata që kanë bërë të mundur identifikimin e tij. Burimet thanë se kanë nisur hetimet për përcaktimin e rrethanave dhe motivit të ngjarjes.