Ministria e Shëndetësisë: Ishte i pamundur shpëtimi i trinjakëve

Në një reagim për mediat, Ministria e Shëndetësisë thotë se ka qenë e pamundur shpëtimi i trinjakëve, pasi komplikacioni ka ndodhur në javën e 24- t. Ndërkohë, ekipi i nisur me urgjencë në Bulqizë me helikopter, përveç ndihmës së dhënë për 31- vjeçaren, ka asistuar dhe në dy lindje të tjera. Ndërhyrja për t'i dhënë ndihmë të specializuar shtatzënës është bërë nga ekipi i urgjencës kombëtare mjekësore, të cilët pas marrjes së njoftimit, kanë shkuar me helikopter në Bulqizë brenda një harku të shkurtër kohor. "Nëna me inicialet E. R., 31 vjeç, është paraqitur në Spitalin e Bulqizës në orën 12: 00 të ditës së sotme. Nëna e re është asistuar për lindjen e trinjakëve me moshë barre të parakohshme 24- javëshe. 31- vjeçarja është asistuar për lindjen e fëmijës së parë nga mjeku i përgjithshëm Fatos Hoxha dhe dy mami të maternitetit të Bulqizës. Për shkak të komplikacioneve, menjëherë është njoftuar ekipi i Urgjencës Kombëtare mjekësore dhe është nisur nga Tirana një ekip i specializuar nga materniteti ' Mbretëresha Geraldinë' me helikopterin e Urgjencës Kombëtare. Brenda 20 minutash, helikopteri me ekipin e specializuar nga Tirana ka mbërritur në Spitalin e Bulqizës. Mjekët e specializuar të maternitetit të Tiranës kanë asistuar dy lindjet e tjera dhe kanë shpëtuar nënën e re, e cila rrezikonte jetën. Për shkak të moshës së vogël të barrës ( 24 javë është e papajtueshme me jetën), trinjakët nuk kanë mundur të mbijetojnë, ndërsa nëna tashmë është jashtë rrezikut për jetën dhe në këto momente është nën kujdesin e mjekëve", thuhet në reagimin e MSH.