Minat shiteshin për 500 euro

Policia e Durrësit kishte siguruar në rrugë operative informacion për aktivitetin kriminal të dy kuksianëve. Sipas hetuesve, Artan Bruka dhe Halil Gjana, përkatësisht 38 dhe 26 vjeç, i prodhonin vetë minat me telekomandë dhe më pas ua shisnin personave të interesuar në shuma që varionin nga 300 deri në 500 euro copa. Mësohet se aktiviteti i tyre kriminal ishte shtrirë në trekëndëshin Kruje- Tiranë- Durrës, ku edhe janë përqendruar grupe të strukturuara kriminale. Por dy të arrestuarit kishin edhe klientë, të cilët kryenin vrasje apo shpërthime me pagesë. Vetë dy të arrestuarit nuk kanë pranuar të bashkëpunojnë me Policinë dhe kanë kërkuar të merren në pyetje në praninë e avokatit.