Kastro Zizo jashtë finales, kolegët s’e votuan për “Sonata e gjumit”

Panorama (Albania) - - PANORAMA PLUS -

Klevis Bega i njohur si Kastro Zizo nuk ka arritur të marrë votat e kolegëve për të prekur finalen e “Kënga Magjike”, spektakli që do të mbahet sot në mbrëmje në skenën e Pallatit të Koncerteve. Burime pranë festivalit kanë përmendur emrin e Kastro Zizos mes të tjerëve BIG, që s’arritën të merrnin pikët e mjaftueshme për t’u kualifikuar në finale. Kastro u pëlqye shumë nga publiku në natën gjysmëfinale, jo vetëm për interpretimin, por edhe për stilin e bukur të veshjes, duke u prezantuar në mënyrë shumë dinjitoze. Kënga është shkruar nga vetë ai, ndërsa për muzikën është përkujdesur Gramoz Kozeli në bashkëpunim me Kastron, kurse orkestrimin e bëri Robert Frroku ( Don Production). Pasi e prezantoi këtë këngë në programin “E diela shqiptare”, Kastro foli për inspirimin për të shkruar “Sonatën e gjumit” dhe falënderoi bashkëpunëtorët. Në postimin e tij për krijimin në fjalë ai shkruante: “’ Sonata e gjumit’. Një këngë që më erdhi si fllad në shpirt para se të flija! Kur u zgjova, vendosa që çdo ëndërr ta bëj realitet… edhe ato ëndrra që në ëndërr nuk më realizohen! Faleminderit Gramoz Kozeli, që u bë një ‘ jetë’ që rrugëtojmë bashkë në muzikë. Faleminderit për notat e tua që i shkrive aq mirë me të miat! Flm Roberto Frroku për punën e paçmuar në orkestrim dhe master si një mjeshtër i vërtetë. Faleminderit Arlind që i dhe dritë këngës me kitarën tënde dhe publikut që ende me mbështet në krijimtarinë time”. Në statusin në fjalë ai tregoi se në skenë u ngjit me veshje të personalizuar nga një stilist. Në lidhje me moskualifikimin, Kastro ende nuk ka folur publikisht. Sa u përket projekteve të tij, Kastron së shpejti do e shohim në politikë, pasi kandidon për kryetar bashkie i Përmetit, ndërkohë që do nisë një program të ri televiziv të orës së vonë në “Ora News”. Ndërsa në muzikë ai ka publikuar disa bashkëpunime siç ishte “Ajo” me Sue, apo kënga me Robert Berishën dhe Eneda Tarifën.

Newspapers in Albanian

Newspapers from Albania

© PressReader. All rights reserved.