Rama: Meta ka marr peng Kushtetutën, e zgjidh Gjykata
KED, ku parashikohet ngritja e Gjykatës Kushtetuese
Përplasja ndërmjet Kryeministrit dhe Presidentit ka vijuar edhe ditën e djeshme në rrjetet sociale. Kryeministri Rama akuzoi dje Presidentin Meta si pengmarrës të Kushtetutës.
Në “Facebook”, Rama shkroi se: “Mos prisni të merrem më me një pengmarrës të Kushtetutës në zyrën e Presidentit, i cili është katandisur në çizme rezervë të Doktoreshës së Shkencave”. Krahas kësaj, Kryeministri theksoi se për t’i dhënë zgjidhje ngërçit, të krijuar në të drejtën e Presidentit për të mos dekretuar një ministër, do të jetë Gjykata Kushtetuese. “Gjykata Kushtetuese do t’i japë fund kësaj maskarade, ndërsa vëmendja jonë do të jetë e gjitha te njerëzit dhe zero te çizmet”, përfundoi komentin e tij në “Facebook” Kryeministri.
GJYKATA
Por si do të ngrihet Gjykata Kushtetuese. Viti 2018 mund të quhet viti i suksesit për procesin e vetingut, por ajo shkaktoi boshatisjen e anëtarëve të Gjykatës Kushtetuese, pasi pjesa më e madhe e tyre nuk arritën të kalojnë procesin e rivlerësimit. Kësisoj, prej disa muajsh në vend nuk ekziston më Gjykata Kushtetuese, pasi aktualisht në detyrë është vetëm një anëtare, Vitore Tusha, së cilës i ka mbaruar mandati, por qëndron në detyrë për shkak të detyrimit ligjor. Ngërçi për plotësimin e karrigeve bosh në Kushtetuese ka qenë Këshilli i Emërimeve në Drejtësi, i cili vetëm në fillim të muajit dhjetor që lamë pas arriti që të plotësohej. Mbledhja e parë e KED- së është njoftuar që të jetë në datën 15 janar, ku, sipas procedurave ligjore, fillon edhe numërimi i ditëve për plotësimin e Gjykatës Kushtetuese.
PROCEDURA
Sipas ligjit për “Organizimin dhe Funksionimin e Gjykatës Kushtetuese”, ajo përbëhet nga nëntë anëtarë, ku tre i përzgjedh Presidenti, tre i përzgjedh Kuvendi dhe tre Gjykata e Lartë. Ligji tjetër, ai për organet e sistemit të drejtësisë parashikon procedurën që do të ndjekë KED për përzgjedhjen e kandidatëve. Konkretisht, nga data 15 janar kur është parashikuar edhe konstituimi i Këshillit, do të bëhet administrimi i vendeve vakante të krijuar në Gjykatën Kushtetuese. Pas kësaj, institucionet kompetente për propozimin e kandidaturave duhet t’i paraqesin Këshillit menjëherë listën e personave, që kanë shprehur interesin për të qenë anëtarë të Kushtetueses. Pas kësaj, brenda 15 ditëve, kandidatët për në Kushtetuese do të pajisen me formularët e deklarimit të pasurisë dhe konfliktit të interesit si edhe me formularët e dekriminalizimit. Për formularët e ILDKPKI- së, kandidatët kanë 15 ditë kohë për t’i plotësuar dhe për t’i dorëzuar pranë KED, ndërsa për formularët e dekriminalizimit kanë 5 ditë afat. Më pas, si ILDKPKI ashtu edhe Prokuroria kanë nga 30 ditë afat për shqyrtimin e formularëve të plotësuar. Krahas këtyre, KED mund t’u drejtohet edhe institucioneve të tjera për të verifikuar figurën e kandidatëve për anëtarë në Kushtetuese, procedurë e cila duhet të bëhet maksimalisht brenda 35 ditëve nga shprehja e interesit. Kësisoj, e gjithë procedura e përzgjedhjes së kandidatëve dhe listimit të tyre duhet të kryet brenda 45 ditëve. Më pas, do të jenë institucionet kompetente që duhet të votojnë kandidatëve. Presiden- ti, brenda 30 ditëve nga depozitimi i listave për tre vendet vakante, duhet të përzgjedhë një nga tre kandidatët në vendet e para të listës së hartuar nga KED. Kuvendi, nga ana tjetër, do të zhvillojë një seancë dëgjimore dhe më pas emrat i voton seanca plenare, me minimalisht 84 vota. Nëse Kuvendi brenda 30 ditëve nuk arrin të votojë kandidatët, atëherë miratohet kandidati i cili është renditur i pari nga KED. E njëjta procedurë është edhe me kandidatët e propozuar nga Gjykata e Lartë, ku ata duhet të votohen nga 3/ 4 e gjyqtarëve. Nëse numri nuk arrihet, zgjidhet ai që është renditur i pari në listë.