Shpërthim në Paris, katër të vdekur
Nisin hetimet, incidenti besohet se nisi nga rrjedhja e gazit në furrë
Një shpërthim i fuqishëm, i shkaktuar nga një rrjedhje gazi, ka marrë jetën e katër personave dhe ka plagosur 47 të tjerë, dhjetë nga të cilët në gjendje të rëndë, mëngjesin e së shtunës në Paris. Autoritetet evakuuan të gjithë banorët pranë zonës. Shpërthimi ishte aq i fuqishëm sa shkaktoi thyerje xhamash dhe përmbysje makinash. Incidenti ndodhi në “Rue de Trevise”, në pjesën verioreqendrore të Parisit, jo larg nga qendra tregtare “Galeries Lafayette”. Incidenti ndodhi në një furrë pjekjeje në orën 09: 00 të mëngjesit, ndërkohë që zjarrfikësit po i përgjigjeshin raportimeve për rrjedhje gazi. Fqinjët kishin ndjerë erën e gazit të shtunën në mëngjes dhe kishin njoftuar shërbimet e emergjencës. Ndërkohë që ata po ndërhynin, ndodhi shpërthimi brenda pastiçerisë “Hubert”, e cila shet kekë mëngjesi dhe pasta. Ministri i Brendshëm francez, Christopher Castano, duke komentuar incidentin ka shkruar në “Twitter”: “Trishtim i thellë. Jemi përkrah familjeve të viktimave. Kombi ndan dhimbjen me ta”. Origjina e shpërthimit është një rrjedhje gazi, por vlerësimi zyrtar do të jepet pas përfundimit të një hetimi që ka nisur. Castano, i cili vizitoi skenën me Kryeministrin francez Edouard Philippe dhe kryetaren e bashkisë së qytetit, Anne Hidalgo, ka shkruar më parë në “Twitter” se bi- lanci i viktimave do të jetë i rëndë. Më shumë se 200 zjarrfikës i janë përgjigjur incidentit. Dy prej tyre ishin mes viktimave. Një nga zjarrfikësit kishte mbetur nën rrënoja pas shpërthimit për rreth dy orë e gjysmë. Policia këshilloi publikun që të qëndrojnë larg nga zona dhe për të bërë hapësirë për automjetet e emergjencës. Gazeta “Le Parisien” ka raportuar se furra nuk ka qenë e hapur për klientë në kohën e shpërthimit. Të lënduarit nga ky zjarr janë dërguar në spital me helikopterë.