Një luftëtar më shumë, Amir Abrashi në fushë pas 10 muajsh
Shqipëria mund të bëjë llogaritë me një luftëtar më shumë për këtë edicion. Amir Abrashi është rikthyer dje në fushën e lojës, pas një mungese të gjatë prej dhjetë muajsh. Në mars ka qenë ndeshja e tij e fundit me Fraiburgun, e vlefshme për Bundesligën gjermane, dhe më tej shqiptari nuk ka luajtur më asnjë takim. Një dëmtim në gju bëri që të kishte nevojë për një ndërhyrje kirurgjikale për të riparuar dëmtimin në ligamentin krociat, që e detyroi mesfushorin kuqezi të mungonte thuajse një vit si për skuadrën e tij, ashtu edhe për Kombëtaren shqiptare. Dje, Abrashi është rikthyer për herë të parë në fushën e lojës si titullar në një ndeshje miqësore me skuadrën e Mainzit, që përfundoi 2- 2. Mesfushori kuqezi luajti për 63 minuta dhe tregoi sërish grintën dhe dëshirën që e karakterizon në mesin e fushës. Abrashi ka lënë pas krahëve dëmtimin dhe tanimë po kryen plotësisht fazën përgatitore, që e bën të gatshëm edhe për kuqezinjtë në muajin mars. Abrashi ka qenë një nga heronjtë e mesfushës së Kombëtares për arritjen në Europian, falë kilometrave të shumta që përshkon gjatë një ndeshjeje futbolli dhe grintës që e karakterizon.