Premtimi në 106- vjetorin e Policisë: Do godasim krimin dhe korrupsionin
Drejtori i Përgjithshëm, Ardi Veliu: Strategji të qarta për një luftë pa kompromis ndaj krimit të organizuar e terrorizmit
Të gjitha strukturat e Policisë së Shtetit festuan dje 106- vjetorin e themelimit, duke premtuar goditjen e krimit dhe korrupsionit.
Në një aktivitet të posaçëm të organizuar nga Drejtoria e Përgjithshme e Policisë dhe Ministria e Brendshme, ministri Sandër Lleshaj dhe drejtori Ardi Veliu premtuan se do të godasim pa kopromis krimin e organizuar, korrupsionin dhe çdo veprimtari tjetër të paligjshme. Gjatë aktivitetit u theksua se në 106 vjet nga themelimi Policia ndryshoi formën dhe përmbajtjen e saj, duke iu nënshtruar kërkesave të kohës dhe komunitetit hap pas hapi. "Filozofia e institucionit nga dikur e hekurt, e standardizuar dhe e detyrueshme sot është fleksibile, tolerante, e hapur dhe e angazhuar për të përvetësuar idetë dhe teknologjitë e reja. Rruga që kemi përshkuar ka pasur sfida të egra, në të cilat na është dashur të mësojmë dhe të lëmë pas. Detyra dhe thelbi i saj mbetet i njëjtë, pavarësisht kohës apo dimensioneve sociale, ne jemi pararojë e mbrojtjes së ligjit. Është pikërisht zbatimi i ligjit kryefjala e betimit të secilit prej nesh", u shpreh gjatë fjalës së tij drejtori i Përgjithshëm i Policisë, Ardi Veliu. Sipas tij, çdo periudhë ka pasur karakteristikat e veta, në të cilat janë vënë re të metat e përparësitë e institucionit dhe metodave të përdorura, duke u krijuar një traditë. DREJTORI I POLICISE "Eksperienca e vyer është një bibliografi, të cilën jo rrallë e shfletojmë dhe i referohemi. Misioni ynë është shërbim ndaj qytetarëve për të ofruar rend dhe siguri, gjithashtu është shërbim që garanton zbatimin e ligjit, duke respektuar liritë dhe të drejtat themelore të njeriut, si shprehja më e lartë e demokracisë së një vendi dhe pasqyra e vërtetë e një shteti demokratik. Me kënaqësi e them se, falë mbështetjes dhe vëmendjes së veçantë të dhënë nga Qeveria, Kryeministri Edi Rama dhe nga ministri i Brendshëm, kjo festë e gjen Policinë e Shtetit si një nga shërbimet më avangardë të administratës publike dhe një nga institucionet më të besuara", tha dje Ardi Veliu. Sipas tij, sot Policia e Shtetit ofron më shumë shërbime, zotëron më shumë mjete dhe teknologji të avancuar, ka një staf më të trajnuar, më të paguar dhe më të motivuar për t'i shërbyer me cilësi komunitetit. Veliu tha se Policia e Shtetit tashmë ka strategji të qarta për një luftë pa kompromis ndaj krimit të organizuar, terrorizmit dhe ekstremizmit të dhunshëm, trafiqeve të paligjshme dhe të gjitha paligjshmërive. Rezultatet e arritura në rrugëtimin e Policisë, sipas tij janë bërë të mundura në sajë të përkushtimit të punonjësve të Policisë, angazhimit dhe në jo pak raste të vetëmohimit të tyre. MINISTRI I BRENDSHEM Ministri i Brendshëm, Sandër Lleshaj, tha dje se përgjatë mëse një shekulli, forcat e rendit dhe të sigurisë publike, të organizuara kryesisht si xhandarmëri në dekadat e para apo si Polici më pas, kanë përballuar një ndër detyrat më të ndërlikuara dhe të vështira në shërbim të Shqipërisë dhe shqiptarëve. Kanë krijuar kushtet për zhvillimin e përgjithshëm të vendit në një mjedis të bren- dshëm dhe të jashtëm jashtëzakonisht të vështirë. Ai tha se në përpjekjen e pandërprerë për vendosjen dhe mbajtjen e rendit dhe sigurisë publike, Policia shqiptare ka paguar një çmim të madh përmes angazhimit, shërbimit, sakrificës, por edhe gjakut të anëtarëve të saj. "Ky përvjetor është rasti më i mirë për të shprehur mirënjohjen më të thellë, për të gjithë ata mijëra burra dhe gra që përgjatë 106 viteve kanë shërbyer me nder në radhët e Policisë së Shtetit. Por nderimi më i madh u përket natyrisht atyre që, gjatë këtyre viteve, kanë dhënë jetën e tyre në përmbushje të misionit fisnik", u shpreh Lleshaj. Sipas tij, në këtë përvjetor, Policia e Shtetit ka rastin jo vetëm për të bërë një bilanc të historisë së saj dhe për të nderuar të rënët, por edhe për të hedhur vështrimin përpara, drejt sfidave dhe detyrave të rëndësishme që qëndrojnë përpara saj.