Policët në lirim urojnë 106- vjetorin

Shoqata e punonjësve të Policisë në lirim 2013, ka përcjellë dje urimet më të mira për një organizatë më të fuqishme, për më shumë suksese, dhe rritje profesionale, në 106- vjetorin e themelimit të Policisë. "Nuk mund të themi se Policia e Shtetit ndodhet në ditët e saj më të mira, por urojmë të reflektohet nga të gjithë, që nga niveli drejtues tek ai bazë, për të punuar dhe përmirësuar veten në detyrat që i dikton pozicioni pa dalë asnjë moment nga shinat e ligjit. Kështu secili jep kontributin e vet në forcimin dhe perfeksionimin e organizatës. Kjo është detyra A e secilit prej nesh që mbartim këtë stemë e uniformë! Nuk ka rëndësi brenda apo jashtë strukturave, profesioni pulson dhe secili duhet ta përkthejë në puls pozitiv me përkushtim në shërbim të organizatës, komunitetit dhe ligjit! Gëzuar për sukseset e organizatës, me urimet që në vijim t'iu rikthehet pas një kohe të gjatë përsëri sukseseve dhe arritjeve pozitive", thuhet në deklaratën e punonjësve të Policisë në lirim 2013.